Aus vs Ind: "இதே பயிற்சியாளர்கள் தொடர வேண்டுமா?" - கம்பீர் குழு நோக்கி கவாஸ்கர் அடுக்கும் கேள்விகள்

கடந்த ஆண்டு ராகுல் டிராவிட் பயிற்சியாளராக இருந்தபோது, ஜூன் மாதம் ஐ.சி.சி டி20 உலகக் கோப்பையை வென்றது இந்திய அணி. ஆனால், கவுதம் கம்பீர் இந்திய அணியின் தலைமைப் பயிற்சியாளராகப் பொறுப்பற்ற பிறகு இந்திய அணி தொடர்ச்சியாகத் தோல்விகளைச் சந்தித்து வருகிறது.

27 ஆண்டுகளுக்குப் பிறகு இலங்கையிடம் ஒருநாள் தொடரை இழந்தது. அதைத்தொடர்ந்து, சொந்த மண்ணில் நியூசிலாந்துடன் 0 - 3 என டெஸ்ட் தொடரை முழுமையாக இழந்தது. இப்போது, ஆஸ்திரேலியாவில் நடைபெற்ற பார்டர்-கவாஸ்கர் டிராபி தொடரை 1 - 3 இழந்திருக்கிறது.

கடைசி இரண்டு டெஸ்ட் தொடர்களில் தோல்வியடைந்ததில் அணியின் பேட்டிங் யூனிட் பர்ஃபாமன்ஸ் மோசமாக இருந்தது முக்கிய காரணம். குறிப்பாக, கேப்டன் ரோஹித் மற்றும் சீனியர் வீரர் கோலி ஆகியோரின் பேட்டிங் கடும் விமர்சனத்துக்குள்ளானது. அதேசமயம், தலைமைப் பயிற்சியாளராகப் பொறுப்பேற்ற பிறகு அணியை எந்த அளவுக்கு முன்னேற்றியிருக்கிறீர்கள் என்ற கேள்விகள் கம்பீர் மீது எழாமலும் இல்லை. இந்த நிலையில், இந்திய அணியின் முன்னாள் கேப்டனும், இந்நாள் வர்ணனையாளருமான சுனில் கவாஸ்கர் அணியின் பயிற்சியாளர்கள் மீதான தனது கேள்விகளை அடுக்கியிருக்கிறார்.

ஸ்டார் ஸ்போர்ட்ஸ் ஊடகத்தில் பேசிய கவாஸ்கர், ``பயிற்சியாளர்கள் என்ன செய்கிறார்கள்? குறிப்பாக பேட்டிங் பயிற்சியாளரைப் பற்றிப் பேசியாக வேண்டும். நியூசிலாந்துக்கெதிரான போட்டிகளைப் பாருங்கள்... அனைவரும் குறைந்த ரன்களில் அவுட். அனைத்து போட்டிகளிலும் தோற்றோம். ஆஸ்திரேலியாவில் கூட பேட்டிங் பலமாக இல்லை. எனவே கேள்விகள் கேட்கப்பட வேண்டும். நீங்கள் (பயிற்சியாளர்கள்) என்ன செய்தீர்கள்? ஏன் எந்த முன்னேற்றத்தையும் நம்மால் காண முடியவில்லை?

நம்முடைய பேட்மேன்ஸ்கள் நன்றாக விளையாட முடியாத அளவுக்குப் பந்துவீசப்பட்டதா என்பதை நீங்கள் கட்டலாம். சிறப்பான பந்துவீச்சு இருந்தால், சிறந்த பேட்ஸ்மேன்கள் கூட தடுமாறுவார்கள். ஆனால், இங்கு அப்படியில்லை. இதுபோன்ற சூழலில் நீங்கள் என்ன செய்தீர்கள் என்பதைக் காட்ட வேண்டும். சில வீரர்கள் எதிர்காலத்தில் ஆடவேண்டுமா என்று என்னிடம் கேட்கப்படுகிறது. அதேபோல, இந்தப் பயிற்சியாளர்கள் குழுவும் தொடர வேண்டுமா என்பதையும் கேட்க வேண்டும்.

நான் சாம்பியன்ஸ் டிராபியைப் பற்றிப் பேசவில்லை. இங்கிலாந்தில் ஐந்து போட்டிகள் கொண்ட டெஸ்ட் தொடரைப் பற்றிப் பேசுகிறேன். அதற்கு இன்னும் சில மாதங்கள் இருக்கின்றன. எனவே நான் கேட்கிறேன், நீங்கள் என்ன செய்தீர்கள்? வீரர்களை நீங்கள் எப்படி மேம்படுத்தப் போகிறீர்கள்? வீரர்களின் அணுகுமுறையில் நீங்கள் பணியாற்ற வேண்டும்." என்று கூறினார்.

VIKATAN PLAY - EXCLUSIVE AUDIO STORIES

நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...

https://bit.ly/MadrasNallaMadras