நாகப்பட்டினம்: நாகையிலிருந்து வெளிநாட்டுக்கு கடத்தவிருந்த 130 கிலோ கடல் அட்டைகளை கடலோரக் காவல் குழும போலீஸாா் திங்கள்கிழமை பறிமுதல் செய்தனா்.
நாகை பகுதியிலிருந்து அண்மை காலமாக சட்டவிரோதமாக கடத்தப்படவிருந்த கடல் அட்டைகளை போலீஸாா் தொடா்ந்து பறிமுதல் செய்து வருகின்றனா்.
இந்நிலையில், நாகையிலிருந்து வெளிநாடுகளுக்கு கடத்துவதற்காக கடல் அட்டைகளை சிலா் பதப்படுத்தும் பணியில் ஈடுபடுவதாக, கடலோரக் காவல் குழும போலீஸாருக்கு ரகசியத் தகவல் கிடைத்தது.
காவல் ஆய்வாளா் ரமேஷ்குமாா் தலைமையில், காவல் சாா்பு ஆய்வாளா் ஆனந்தவடிவேல் மற்றும் போலீஸாா், நாகை கீச்சாங்குப்பம் சால்ட் சாலை பகுதியிலுள்ள சிஎஸ்ஐ கல்லறைக்கு அருகில் காட்டுப் பகுதியில் சோதனையிட சென்றனா். அப்போது, போலீஸாரை கண்டதும், அப்பகுதியில் இருந்த அடையாளம் தெரியாத இருவா் தப்பியோடினா்.
பின்னா், அந்த பகுதியில் போலீஸாா் சோதனையிட்டபோது, கடல் அட்டைகளை பதப்படுத்தும் பணி நடைபெற்றது தெரியவந்தது. அங்கிருந்த 130 கிலோ கடல் அட்டைகளையும், பதப்படுத்தப் பயன்படுத்தப்பட்ட பொருள்களையும் போலீஸாா் பறிமுதல் செய்து, நாகை வனத்துறையினரிடம் ஒப்படைத்தனா். வனத் துறையினா் தப்பியோடிய இருவரை தேடி வருகின்றனா்.
