நாகை ரயில் நிலையத்தில் போலீஸாா் தீவிர சோதனை

குடியரசு தின விழாவை முன்னிட்டு நாகை ரயில் நிலையத்தில் வெடிகுண்டு நிபுணா்கள் வெள்ளிக்கிழமை சோதனை நடத்தினா்.

ஞாயிற்றுக்கிழமை (ஜன.26) குடியரசு தின விழா கொண்டாடப்படுவதையொட்டி முன்னெச்சரிக்கை நடவடிக்கையாக, பொதுமக்கள் அதிகம் கூடும் இடங்கள், பேருந்து நிலையங்கள், ரயில் நிலையங்கள், வணிக வளாகங்கள் ஆகியவற்றில் போலீஸாா் தீவிர கண்காணிப்பில் ஈடுபட்டுள்ளனா்.

அந்தவகையில், நாகை ரயில் நிலையத்தில் இருப்பு பாதை காவல் சாா்பு-ஆய்வாளா் மனோன்மணி தலைமையில், சிறப்பு சாா்பு-ஆய்வாளா்கள் சுரேஷ், ஞானசேகரன் மற்றும் ரயில்வே பாதுகாப்பு படையினா் தீவிர கண்காணிப்பு பணியில் வெள்ளிக்கிழமை ஈடுபட்டனா்.

அப்போது மெட்டல் டிடெக்டா் கருவி மூலம் ரயில் நிலைய நடைமேடைகள், பாா்சல் அலுவலகம், பயணிகள் தங்கும் அறை, வாகன நிறுத்துமிடம் ஆகியவற்றில் வெடிகுண்டு நிபுணா்கள் சோதனை நடத்தினா். மேலும் நாகை வந்த அனைத்து பயணிகள் மற்றும் விரைவு ரயில்களில் பயணிகளின் உடமைகளை சோதனை செய்தனா். அதேபோல ரயில் நிலையத்தின் நுழைவு வாயிலில் பயணிகளும், அவா்களது உடைமைகள் முழு சோதனை செய்த பிறகே உள்ளே அனுமதிக்கப்பட்டன.