நாடோடியாகத் திரிந்த முதியவரை மீட்டு, கேரளாவில் குடும்பத்தினருடன் சேர்த்து வைத்த காவலர்!

விருதுநகர் மாவட்டம் ஆவியூர் காவல் நிலையத்தில் பணிபுரியும் காவலர் ரெங்கராஜன். இவர் கடந்த 25.01.2025-ந் தேதி காலை 8 மணிக்கு பணி முடித்து வீடு திரும்பினார். அப்போது சாலையின் ஓரத்தில் முதியவர் ஒருவர், கிழிந்த ஆடைகளுடன் சோர்ந்து கிடப்பதை பார்த்த அவர், தனது டூவீலரை நிறுத்திவிட்டு முதியவரிடம் சென்று நலம் விசாரித்தார். அப்போது, தனது பெயர் முரளி, கோட்டயம் பகுதியைச் சேர்ந்தவன். நாடோடியாக திரிந்து வந்த நான் தற்போது இந்த ஊருக்கு வந்து சிக்கிக் கொண்டேன் என கூறியுள்ளார். இதையடுத்து பேசிய ரெங்கராஜன், 'இப்போது சொந்த ஊருக்கு திரும்ப அனுப்பி வைத்தால் செல்வீர்களா? உங்களுக்கு சம்மதமா? என கேட்கவும் முதியவர் சம்மதம் தெரிவித்துள்ளார்.

இதையடுத்து அவரை குளிக்க வைத்து புதிய ஆடை மற்றும் உணவு வாங்கிக்கொடுத்து முதியவரை மாற்றினார். தொடர்ந்து அவரின் உடமைகளை சோதனை செய்தபோது, முதியவர் கோட்டயம் முட்டம் பகுதியைச் சேர்ந்தவர் எனத் தெரியவந்தது. இதையடுத்து முட்டம் காவல் நிலையத்துக்கு தகவல் தெரிவித்து பேசினார். அப்போது முதியவர் முரளி வெள்ளூர் வட்டத்தை சேர்ந்தவர், அவர் காணாமல் போய் ஒன்றரை வருடம் ஆகிவிட்டது என்றும் தெரியவந்தது. இதையடுத்து, அவர் தமிழ்நாட்டில் ஆவியூர் அருகே ஆதரவற்று இருப்பதை தெரியப்படுத்திய காவலர் ரெங்கராஜன், சொந்த ஊருக்கு அனுப்பி வைப்பதாக உறுதியளித்தார்.

அதன்படி, தனது டூவீலரில் முதியவர் முரளியை திருமங்கலத்திற்கு அழைத்துச் சென்ற ரெங்கராஜன், திருமங்கலம் பஸ் நிலையத்தில் இருந்து தேனி செல்லும் பேருந்தில் முதியவருக்கு பயணச்சீட்டு வாங்கி கொடுத்ததுடன், தேனியிலிருந்து அவரை கேரளா மாநிலம் கோட்டயம் செல்லும் பேருந்தில் ஏற்றிவிடுமாறு நடத்துனரிடம் கேட்டுக்கொண்டார். மேலும் முதியவரின் வழிச்செலவுக்காக அவரிடம் 500 ரூபாயை கொடுத்து வாஞ்சையுடன்‌ நடந்துகொண்டார். தொடர்ந்து, நன்பகலில் தொடர்பு கொண்ட போலீஸார், முதியவர் முரளி தற்போது எங்கிருக்கிறார் என விவரம் கேட்டனர்.

அவர் பூம்பாறை வந்து சேர்ந்திருப்பதாக தகவல் தெரிவிக்கவும், கேரளா போலீசார் முரளியை பூம்பாறையில் மீட்டு கோட்டயம் செல்லும் பேருந்தில் அனுப்பி வைத்தனர். இதையடுத்து முரளி கோட்டயம் சென்றடைந்த பின்பு கேரள போலீஸார் அவரை மீட்டு குடும்பத்தினரிடம் ஒப்படைத்தனர். முதியவர் முரளி வீடு சென்று சேர்ந்ததையடுத்து, கேரளா போலீஸாரும் அவரின் குடும்பத்தினரும் ரெங்கராஜனுக்கு பாராட்டுகளை தெரிவித்தனர்.