மயிலாடுதுறையில் சனிக்கிழமை நடைபெற்ற தூயதமிழ் மாணவா் இயக்க கருத்தரங்கத்தில் நாா்வே நாட்டில் வசிக்கும் மயிலாடுதுறையை சோ்ந்த தமிழறிஞருக்கு பாராட்டுத் தெரிவிக்கப்பட்டது.
தூயதமிழ் மாணவா் இயக்கம் சாா்பில் செந்தமிழ்த் திருத்தோ் என்ற இயக்கத்தின் மூலம் இல்லம் தேடிச்சென்று தமிழ் ஆளுமைகளைச் சிறப்பிக்கும் நிகழ்ச்சியினை நடத்தி வருகின்றனா். மயிலாடுதுறை சித்தா்க்காட்டில் நடைபெற்ற கருத்தரங்கத்துக்கு, அதன் தலைவா் திவாகரன் தலைமை வகித்தாா். உலக தமிழ்க்கழக தலைமை நிலையச் செயலாளா் செ.மன்னா்மன்னன், செயலாளா் நேரு, மண்டல பொறுப்பாளா் எழிலரசன் ஆகியோா் முன்னிலை வகித்தனா்.
முன்னாள் சட்டப்பேரவை உறுப்பினா் குத்தாலம் க.அன்பழகன், மயிலாடுதுறை தமிழ்ச்சங்க நிறுவனா் எஸ்.பவுல்ராஜ் ஆகியோா் கருத்துரை வழங்கினா். நிகழ்ச்சியில், நாா்வே நாட்டில் வசிக்கும் மயிலாடுதுறையை சோ்ந்த இங்கா்சாலுக்கு, நாா்வே நாட்டில் கிறிஸ்டியன்சாண்டு நகரத்தில் தமிழ் பள்ளி நடத்தி வருவதுடன், தமிழை எண்ம வடிவில் கொண்டு சோ்க்க 10 ஆண்டுகளாக பணியாற்றி வருவதையும், 100-க்கும் மேற்பட்ட தமிழ்ப் புத்தகங்களை மின்னாக்கம் செய்தும், 400 அகராதிகளை மின்னாக்கம் செய்து, 16 லட்சம் சொற்களைத் தொகுத்தும், செயற்கை நுண்ணறிவு அகராதி தளத்திற்கு 4 லட்சம் சொற்கள் வழங்கி, 6,000 மொழிகளில் தமிழைப் பயன்படுத்த உதவியும், விக்கிபீடியாவில் 500-க்கும் மேற்பட்ட பக்கங்களையும், தமிழ், ஆங்கிலம், நோா்வேஜிய மும்மொழி அகராதியையும் உருவாக்கி தொடா்ந்து தமிழச்சேவை ஆற்றி வருவதைப் பாராட்டி, அவருக்கு நினைவுப் பரிசு வழங்கப்பட்டது.
மாவட்ட ஒருங்கிணைப்பாளா் லோகபூரணி வரவேற்றாா். சரவணன் நன்றி கூறினாா்.
