பல்வேறு கோரிக்கைகளை வலியுறுத்தி, கடலூா் மாவட்டம், சிதம்பரம் அண்ணாமலைப் பல்கலைக்கழக ஆசிரியா்கள் கூட்டமைப்பு சாா்பில் பெருந்திரள் கவன ஈா்ப்பு ஆா்ப்பாட்டம் புதன்கிழமை நடைபெற்றது.
ஏழாவது ஊதியக்குழு நிலுவைத் தொகைகளை உடனடியாக வழங்க வேண்டும். யுஜிசி விதிமுறைகளின் படி ஆசிரியா்கள் பணியில் சோ்ந்த பிறகு பெற்ற முனைவா் பட்டங்களுக்கான ஊக்கத்தொகைகளை உடனடியாக வழங்க வேண்டும், அயற்பணியிட ஆசிரியா்களை தற்போது பணிபுரியும் கல்லூரிகள், கல்வி நிறுவனங்களிலேயே உடனடியாக உள்ளெடுப்பு செய்வதுடன், பல்கலைக்கழக துறைகளில் உள்ள காலிப் பணியிடங்களுக்கு ஏற்ப அயற்பணியிட ஆசிரியா்களை பல்கலைக்கழகத்துக்கு திரும்ப அழைக்க வேண்டும்.
2019-ஆம் ஆண்டுக்கு பிறகு வழங்கப்படாமல் உள்ள காலமுறை பதவி உயா்வுகளை உடனடியாக வழங்க வேண்டும், யுஜிசி மற்றும் தமிழக அரசின் விதிமுறைகளின்படி 6 மாதங்களுக்கு ஒருமுறை இந்தப் பதவி உயா்வுகள் வழங்கப்பட வேண்டும் என்பன உள்ளிட்ட பல்வேறு கோரிக்கைகளை வலியுறுத்தி ஆா்ப்பாட்டம் நடைபெற்றது.
அண்ணாமலைப் பல்கலைக்கழக ஆசிரியா்கள் கூட்டமைப்பு ஒருங்கிணைப்பாளா் பேராசிரியா் சி.சுப்ரமணியன் தலைமை வகித்து பேசினாா். கூட்டமைப்பு நிா்வாகிகள் பேராசிரியா்கள் பி.செல்வராஜ், வி.இமயவரம்பன், முத்து வேலாயுதம், செல்ல பாலு உள்ளிட்டோா் கோரிக்கைகளை வலியுறுத்தி பேசினா்.
