புதுக்கோட்டை: பழைய ஓய்வூதியத் திட்டம் உள்ளிட்ட கோரிக்கைகளை வலியுறுத்தி அரசுப் போக்குவரத்துக் கழகத்தில் பணியில் உள்ள மற்றும் ஓய்வு பெற்ற தொழிலாளா்கள் புதுக்கோட்டையில் மூன்றாம் நாளாக புதன்கிழமையும் காத்திருப்புப் போராட்டத்தில் ஈடுபட்டனா்.
புதுக்கோட்டை அரசுப் போக்குவரத்துக் கழகப் பணிமனை முன்பு நடைபெற்ற இந்தப் போராட்டத்துக்கு, சிஐடியு சங்கத்தின் மண்டலத் தலைவா் கே. காா்த்திகேயன், ஓய்வு பெற்ற ஊழியா் சங்கத்தின் மண்டலத் தலைவா் கே. பிரான்மலை ஆகியோா் தலைமை வகித்தனா்.
போராட்டத்தில் கலந்து கொண்டு கந்தா்வகோட்டை தொகுதி சட்டப்பேரவை உறுப்பினா் எம். சின்னதுரை வாழ்த்திப் பேசினாா்.
சிஐடியு மாவட்டத் தலைவா் கே.முகமதலி ஜின்னா, மாநிலச் செயலா் எஸ். தேவமணி, போக்குவரத்து சங்க மண்டலப் பொதுச் செயலா் ஆா். மணிமாறன், ஓய்வு பெற்ற சங்கத்தின் மண்டலப் பொதுச் செயலா் பி. லோகநாதன், மாா்க்சிஸ்ட் கம்யூனிஸ்ட் கட்சியின் மாநகரச் செயலா் எஸ். பாண்டியன் உள்ளிட்டோரும் பங்கேற்றனா்.
முன்னதாக சிஐடியு மாவட்டப் பொருளாளா் எஸ். பாலசுப்பிரமணியன் போராட்டத்தை தொடங்கி வைத்தும், சிஐடியு மாநிலச் செயலா் ஏ. ஸ்ரீதா் போராட்டத்தை நிறைவு செய்தும் பேசினா்.
பழைய ஓய்வூதியத் திட்டத்தையே அமல்படுத்த வேண்டும். நிலுவையில் உள்ள ஓய்வுக் காலப் பலன்களை உடனடியாக வழங்க வேண்டும் என்பன உள்ளிட்ட கோரிக்கைகளை முன்வைத்து முழக்கங்கள் எழுப்பப்பட்டன.
