போதையில்லா பாதை சமுதாயத்தை உருவாக்குவது அனைவரின் கடமை: ஆட்சியா் வலியுறுத்தல்

போதையில்லா பாதை கொண்ட சமுதாயத்தை உருவாக்குவதும், வளரும் இளம் தலைமுறையினரை பாதுகாப்பதும் அனைவரின் கடமை என்று நாமக்கல் மாவட்ட ஆட்சியா் ச.உமா தெரிவித்தாா்.

நாமக்கல் மாவட்டத்தில் உள்ள அனைத்துப் பள்ளி, கல்லூரிகளின் ஒருங்கிணைப்பாளா்கள் பங்கேற்ற போதைப்பொருள் தடுப்பு, நுகா்வோா் பாதுகாப்பு விழிப்புணா்வு கருத்தரங்கம் அரசு மருத்துவக் கல்லூரி கலையரங்கில் மாவட்ட ஆட்சியா் ச.உமா தலைமையில் செவ்வாய்க்கிழமை நடைபெற்றது.

இதில், அவா் பேசியதாவது: நாமக்கல் மாவட்டத்தை போதைப்பொருள் இல்லாத மாவட்டமாக உருவாக்க அனைவரும் ஒத்துழைக்க வேண்டும். போதைப்பொருளை பயன்படுத்துவதால் சுய சிந்தனையின்றி பல்வேறு குற்றங்களில் ஈடுபடுகின்றனா்.

பள்ளி, கல்லூரி மாணவ, மாணவிகளின் நடவடிக்கைகளை நாம் கண்காணிக்க வேண்டும். மாதா, பிதா, குரு என்ற உயா்நிலையில் ஆசிரியா்கள் உள்ளனா். மாணவா்களை தங்கள் குழந்தைகளை போல பாதுகாத்து, அவா்களுக்கு சமுதாயத்தில் ஏதேனும் பிரச்னைகள் இருப்பின் கண்டறிந்து தீா்க்க வேண்டும்.

இன்றைய சூழ்நிலையில் பெற்றோா் வேலைக்கு செல்வதால் அவா்கள் குழந்தைகளிடம் பேசி, விளையாடி நேரம் ஒதுக்குவது இல்லை. பெற்றோா் அதிக நேரம் தங்கள் குழந்தைகளுடன் இருக்க வேண்டும். போதைப்பொருள் எவ்வாறு கிடைக்கிறது என்பது குறித்தும், பயன்படுத்துபவா்கள் குறித்தும் தொடா்ந்து கண்காணிக்க வேண்டும்.

பள்ளி, கல்லூரி வளாகங்களிலிருந்து 100 மீட்டா் இடைவெளியில் போதைப் பொருள்கள் விற்பனை முற்றிலும் தடை செய்யப்பட்டுள்ள நிலையில், விற்பனை செய்பவா்கள் பல்வேறு வழிகளை பின்பற்றி இருசக்கர வாகனம் பழுது பாா்க்கும் இடம், பழக்கடைகள், பெட்டிக் கடைகள், தேநீா் கடைகளில் கூட போதைப்பொருள் விற்பனை நடைபெறுவதாக தகவல் உள்ளது. இது தனிநபா் சாா்ந்த பிரச்னை இல்லை. சங்கிலி தொடா்போல பல்வேறு நிலைகளில் சமுதாயத்திற்கு பாதிப்பு ஏற்படுத்தும். இதனால் ஆண், பெண் குழந்தைகளுக்கு போதிய பாதுகாப்பு இல்லாத சூழ்நிலை ஏற்படுகிறது.

பல்வேறு துறைகளில் தமிழகம் வேகமாக வளா்ச்சியடைந்து வரும் நிலையில் இத்தகைய போதைப்பொருள் பயன்பாட்டால் நாம் பெறும் வெற்றி பயனற்ாக மாறும் சூழ்நிலை ஏற்படுகிறது. வளரும் இளம் தலைமுறையினரை பாதுகாக்க வேண்டியது நம் அனைவரின் கடமை. பள்ளியில்தான் குழந்தைகள் அதிக நேரம் உள்ளனா். போதைப்பொருள்கள் தடுப்பு குறித்து மாணவ, மாணவிகளுக்கு ஆசிரியா்கள் கற்றுக்கொடுக்க வேண்டும்.

தகவல் தொழில்நுட்பம் நிறைந்த இன்றைய காலத்தில் சமூக வலைதளங்களை மாணவா்கள் அதிகம் பயன்படுத்துகின்றனா். ஆக்கப்பூா்வமான கருத்துகளுக்கு மட்டும் கைப்பேசியை பயன்படுத்த வேண்டும். மாணவா்களின் அன்றாட செயல்பாடுகளில் ஏதேனும் மாற்றங்கள் தென்பட்டால் ஆசிரியா்கள் உடனடியாக கலந்துரையாடி ஆலோசனைகள் வழங்க வேண்டும்.

புத்தக கல்வியை விட வாழ்க்கை கல்வியின் முக்கியத்துவத்தை குழந்தைகளுக்கு எடுத்துரைக்க வேண்டும். இதை ஆசிரியா்கள் சுமையாக கருதாமல் நாள்தோறும் குழந்தைகளின் மன நிலை, உடல்நிலை குறித்து கண்காணித்திட வேண்டிய மிக முக்கிய பொறுப்பு ஆசிரியா்களுக்கு உண்டு. போதைப்பொருள்கள் இல்லாத மாவட்டம் என்ற நிலையை அனைவரும் உருவாக்க வேண்டும் என்றாா்.

கூட்டத்தில், மாவட்ட காவல் கண்காணிப்பாளா் ச.ராஜேஸ்கண்ணன், கூடுதல் காவல் கண்காணிப்பாளா்கள் ம.சண்முகம், தனராசு, நாமக்கல் அரசு மருத்துவக் கல்லூரி முதல்வா் கே.சாந்தா அருள்மொழி, மாவட்ட மேலாளா் (டாஸ்மாக்) ந.கனக மாணிக்கம், திட்ட இயக்குநா் (மகளிா் திட்டம்) கு.செல்வராசு, கல்லூரி கல்வி மண்டல இணை இயக்குநா் சிந்தியாசெல்வி உள்பட காவல்துறையினா், கல்லூரி பேராசிரியா்கள், பள்ளி ஆசிரியா்கள், மாணவா்கள், துறை சாா்ந்த அலுவலா்கள் கலந்து கொண்டனா்.