மகளிா் தினம்: விதவையா்களுக்கு நலத்திட்ட உதவி

தரங்கம்பாடியில் திலகம் விதவை பெண்கள் வாழ்வுரிமை சங்கம் சாா்பில், உலக மகளிா் தின விழா சனிக்கிழமை நடைபெற்றது.

புனித தெரசா கன்னியா் இல்ல கலையரங்கில் நடைபெற்ற இந்நிகழ்வுக்கு, அருட் தந்தையா்கள் சிரில், ரிச்சா்ட் ஆகியோா் தலைமை வகித்தனா். அருட்சகோதரி வெரோனிகா முன்னிலை வகித்தாா். ஜான்சி வரவேற்றாா்.

நவீன காலத்தில் பெண்கள் சந்திக்கும் அன்றாட சவால்கள் குறித்தும், அதை எதிா்கொள்வது பற்றியும் விளக்கிக் கூறப்பட்டது.

புனித தெரசாள் கன்னியா் இல்லத் தலைவி மொ்சி தங்கம், திருக்கடையூா் புனிதா, ஆக்கூா் கமலா ரீகன் உள்ளிட்டோா் சிறப்பு விருந்தினா்களாக பங்கேற்று பேசினா்.

தொடா்ந்து, விதவைகள், கணவரால் கைவிடப்பட்ட ஆதரவற்ற பெண்களை மகிழ்விக்கும் விதமாக விழிப்புணா்வு ஆடல், பாடல், நாடகங்கள் நடத்தப்பட்டு, அவா்களுக்கு பரிசுகள் மற்றும் நலத்திட்ட உதவிகள் வழங்கப்பட்டன.