நீலகிரி மாவட்டம், மஞ்சூா் அருகேயுள்ள எடக்காடு அறையட்டி பகுதியில் சிறுத்தை தாக்கியதில் தோட்டத் தொழிலாளி வெள்ளிக்கிழமை உயிரிழந்தாா்.
உதகையை அடுத்த எடக்காடு அறையட்டி பகுதி முக்குருத்தி மற்றும் அவலாஞ்சி வனப் பகுதியை ஒட்டி அமைந்துள்ளது. இங்குள்ள வனப் பகுதியில் புலி, சிறுத்தை, கரடி உள்ளிட்ட வன விலங்குகள் அதிக அளவில் உள்ளன.
இந்தப் பகுதியைச் சோ்ந்த சதீஷ் (32) என்ற தோட்டத் தொழிலாளி வேலைக்குச் சென்றுவிட்டு வெள்ளிக்கிழமை மாலை வீட்டுக்குத் திரும்பிக் கொண்டிருந்தாா். அப்போது அப்பகுதியில் உள்ள தேயிலைத் தோட்டத்தில் மறைந்திருந்த சிறுத்தை அவரைத் தாக்கியது.
சதீஷின் அலறல் சப்தம் கேட்டு அப்பகுதியில் இருந்தவா்கள் உடனடியாக அவரைக் காப்பாற்ற முயன்றனா். மேலும், வனத் துறையினா் மற்றும் காவல் துறையினருக்குத் தகவல் தெரிவித்தனா். சிறுத்தை தாக்கியதில் சதீஷ் சம்பவ இடத்திலேயே உயிரிழந்தாா். காவல் துறையினா் வந்து சடலத்தைக் கைப்பற்றி உடற்கூறாய்வுக்காக உதகை அரசு மருத்துவமனைக்கு அனுப்பிவைத்தனா்.
இப்பகுதியில் சிறுத்தை நடமாட்டம் உள்ளதாக பல முறை முறையிட்டும் ஏன் நடவடிக்கை எடுக்கவில்லை என்று கூறி அங்கு வந்த வனத் துறையினரை அப்பகுதி மக்கள் முற்றுகையிட்டு வாக்குவாதத்தில் ஈடுபட்டனா். இதனால் மஞ்சூா் எடக்காடு சாலையில் சிறிது நேரம் போக்குவரத்து பாதிக்கப்பட்டது.
போலீஸாா் சமாதானப்படுத்தியதை அடுத்து அனைவரும் கலைந்து சென்றனா். சம்பவம் குறித்து வனத் துறையினா் மற்றும் மஞ்சூா் காவல் துறையினா் விசாரித்து வருகின்றனா்.
