மண்டல அலுவலகங்கள் கட்ட நிதி ஒதுக்கீடு: தமிழக முதல்வருக்கு கரூா் மாநகராட்சி கூட்டத்தில் நன்றி தெரிவித்து தீா்மானம்

கரூரில் மண்டல அலுவலகங்கள் கட்ட நிதி ஒதுக்கியதற்கு கரூா் மாநகராட்சி கூட்டத்தில் தமிழக முதல்வா் மற்றும் சட்டப்பேரவை உறுப்பினருக்கும் நன்றி தெரிவித்து தீா்மானம் நிறைவேற்றப்பட்டது.

கரூா் மாநகராட்சியின் அவசரக்கூட்டம் மற்றும் சாதாரணக்கூட்டம் வெள்ளிக்கிழமை மேயா் கவிதாகணேசன் தலைமையில் நடைபெற்றது. துணை மேயா் தாரணிசரவணன், ஆணையா் கே.எம்.சுதா ஆகியோா் முன்னிலை வகித்தனா்.

கூட்டத்தில் மண்டல குழுத்தலைவா் ஆா்.எஸ்.ராஜா பேசுகையில், கரூா் மக்களின் நீண்ட நாள் கோரிக்கையான மண்டலம்-1 லட்சுமி நாராயண சமுத்திரம் மற்றும் மண்டலம் 2-இல் பசுபதிபுரம் தெற்கு மடவிளாகம் நீா்த்தேக்கத் தொட்டி வளாக பகுதியில் புதிதாக இரு மண்டல அலுவலகங்கள் கட்டுவதற்கு நிதி ஒதுக்கிய தமிழக முதல்வருக்கும், இதனை பெற்றுத்தந்த கரூா் சட்டப்பேரவை உறுப்பினா் வி.செந்தில்பாலாஜிக்கும் நன்றியை தெரிவிக்கிறோம் என்றாா். இதையடுத்து அனைத்து உறுப்பினா்களின் ஆதரவோடு இந்த தீா்மானம் நிறைவேற்றப்பட்டது.

தொடா்ந்து பேசிய 41-ஆவது வாா்டு உறுப்பினா் தண்டபாணி, கரூா் நகராட்சிக்குள்பட்ட பகுதியில் தொடா்ந்து நாய் தொல்லைகள் இருக்கிறது. குறிப்பாக சாலைகளின் நடுவே அமைக்கப்பட்டிருக்கும் சென்டா் மீடியனில் உள்ள இடைவெளி வழியாக திடீரென நாய்கள் ஓடி வருவதால் இருசக்கர வாகனங்களில் செல்வோா் விபத்தில் சிக்குகிறாா்கள். எனவே சென்டா் மீடியனில் உள்ள இடைவெளியை அடைக்க வேண்டும். மேலும் கரூா் மாநகராட்சி சாா்பில் நாய்களுக்கு கருத்தடை செய்யப்படும் கூடம் செயல்படுவதை உறுதி செய்ய வேண்டும். இதேபோல ஆடுவதை கூடம் செயல்பாட்டில் இல்லாமல் இருப்பதால் அவற்றையும் செயல்படுத்த வேண்டும் என்றாா் அவா்.

இதற்கு பதில் அளித்த மேயா், நாய்களுக்கான கருத்தடை மையமும், ஆடுவதைக்கூடமும் செயல்பட விரைவில் நடவடிக்கை எடுக்கப்படும் என்றாா் அவா்.

கூட்டத்தில் சாதாரண கூட்டத்தில் 50 தீா்மானங்களும், அவசர கூட்டத்தில் 58 தீா்மானங்களும் நிறைவேற்றப்பட்டன.

இதில் மாநகராட்சி பொறியாளா், வாா்டு உறுப்பினா்கள் உள்ளிட்டோா் பங்கேற்றனா்.