மத்திய அரசின் திட்டங்களால்தான் தமிழகம் வளா்ந்துள்ளது!

மத்திய அரசின் பல்வேறு திட்டங்களால்தான் தமிழகம் வளா்ச்சி அடைந்துள்ளது என பாஜக தேசிய செயற்குழு உறுப்பினா் நரேந்திரன் தெரிவித்தாா்.

பிரதமா் மோடியின் 11 ஆண்டுகால ஆட்சியின் சாதனைகள் குறித்து பாஜக சாா்பில் ஜூன் 25-ஆம் தேதிவரை தெருமுனை பிரசாரம் செய்ய திட்டமிடப்பட்டுள்ளது. இதுகுறித்த ஆலோசனைக் கூட்டம் பாஜக கிருஷ்ணகிரி கிழக்கு மாவட்ட அலுவலகத்தில் சனிக்கிழமை நடைபெற்றது. இதைத் தொடா்ந்து, பாஜக தேசிய செயற்குழு உறுப்பினா் நரேந்திரன் செய்தியாளா்களிடம் கூறியதாவது:

மோடி பிரதமராக பதவியேற்ற பிறகு இந்தியா பொருளாதாரத்தில் உலகளவில் 4-ஆவது இடத்துக்கு உயா்ந்துள்ளது; 2047-ஆம் ஆண்டில் முதலிடம் பிடிக்கும். எண்ம (டிஜிட்டல்) பணப் பரிவா்த்தனையில் உலகின் முன்னணி நாடாக மாறி உள்ளோம். உள்நாட்டில் தயாா்செய்யப்படும் பொருள்கள் அனைத்து நாட்டுக்கும் ஏற்றுமதி செய்யப்படுகின்றன.

நாடுமுழுவதும் அனைத்து வீடுகளுக்கும் எரிவாயு இணைப்பு வழங்கப்பட்டுள்ளது. மின் இணைப்பு இல்லாத கிராமங்கள் என்ற இலக்கை அடைய, அனைத்து வீடுகளுக்கும் மின் இணைப்பு வழங்க நடவடிக்கை எடுக்கப்பட்டு வருகிறது. வரி செலுத்துவோரின் எண்ணிக்கை அதிகரிப்பால், மத்திய அரசு முன்னேற்றத் திட்டங்களை செயல்படுத்த முடிகிறது. நாட்டில் விலைவாசி கட்டுப்பாட்டில் உள்ளது.

மத்திய அரசின் திட்டங்களால்தான் தமிழகம் வளா்ச்சி அடைந்துள்ளது. மத்திய அரசின் சிறந்த திட்டங்களை தமிழகத்தில் திமுக மற்றும் அதன் கூட்டணி கட்சிகள் எதிா்க்கின்றன.

தமிழக வளா்ச்சிக்கு மத்திய அரசு ரூ. 10 லட்சம் கோடிக்கும் அதிகமாக நிதி வழங்கி உள்ளது. ஜல்ஜீவன் திட்டத்தில் நாடு முழுவதும் 33 கோடி குடிநீா் இணைப்புகளும், தமிழகத்துக்கு மட்டும் 13 கோடி இணைப்புகளும் வழங்கப்பட்டுள்ளன. கிருஷ்ணகிரி மாவட்டத்தில் ஓலா, டாடா எலக்ட்ரானிக்ஸ் போன்ற நிறுவனங்கள் மத்திய அரசின் உதவியால் தொடங்கப்பட்டு, பல லட்சம் போ் வேலைவாய்ப்பை பெற்றுள்ளனா்.

பல்வேறு கட்சிகள் அவா்களின் நிலைப்பாட்டை கூறிவருகின்றனா். வரும் செப்டம்பா் மாதத்துக்கு பிறகுதான் கூட்டணி கட்சிகளின் நிலைப்பாடு தெரியும். வரும் சட்டப் பேரவைத் தோ்தலில் தேசிய ஜனநாயக கூட்டணி வெற்றிபெறும் என்றாா்.

அப்போது, பாஜக மாவட்டத் தலைவா்கள் கவியரசு (கிழக்கு), நாராயணன் (மேற்கு), மாவட்ட முன்னாள் தலைவா் சிவபிரகாசம் உள்ளிட்டோா் உடனிருந்தனா்.