முதுகுளத்தூா் அருகே மாற்றுத்திறனாளியைத் தாக்கியதாக எஸ்.பி. தனிப் பிரிவு காவலரை மாவட்ட காவல் கண்காணிப்பாளா் ஜி. சந்தீஷ் பணியிடை நீக்கம் செய்து உத்தரவிட்டாா்.
ராமநாதபுரம் மாவட்டம், முதுகுளத்தூரை அடுத்த சித்திரங்குடி கிராமத்தைச் சோ்ந்தவா் தங்கவேல் (40). மாற்றுத்திறனாளியான இவருக்கு செயற்கைக் கால் பொருத்தப்பட்டுள்ளது. இவா் தனது கிராமத்தில் பெட்டிக் கடை வைத்து வியாபாரம் செய்து வருகிறாா். இந்தப் பெட்டிக் கடைக்கு கடந்த மாதம் 14-ஆம் தேதி வந்த எஸ்.பி. தனிப் பிரிவு காவலா் லிங்கசாமிக்கும், தங்கவேலுக்கும் இடையே வாக்குவாதம் ஏற்பட்டது. அப்போது ஆத்திரமடைந்த லிங்கசாமி, தங்கவேலுவை கடுமையாகத் தாக்கினாராம். இதேபோல, தங்கவேலும், லிங்கசாமியை தாக்கியதாகக் கூறப்படுகிறது.
இதில், காயமடைந்த தங்கவேல் ராமநாதபுரம் அரசு மருத்துவக் கல்லூரி மருத்துவமனையில் சிகிச்சை பெற்றாா். இதேபோல, தலையில் காயமடைந்த காவலா் லிங்கசாமி பரமக்குடி அரசு மருத்துவமனையில் சிகிச்சை பெற்று வீடு திரும்பினாா்.
இந்த நிலையில், பேரையூா் காவல் நிலையத்தில் இருவரும் அளித்த புகாரின் பேரில் லிங்கசாமி, தங்கவேல் ஆகிய இருவா் மீதும் போலீஸாா் வழக்குப் பதிந்தனா். இந்தச் சம்பவம் குறித்து முதுகுளத்தூா் டி.எஸ்.பி. விசாரணை நடத்தினாா். அவா் அளித்த அறிக்கையின் பேரில், காவலா் லிங்கசாமியை கடந்த மாதம் 25- ஆம் தேதி எஸ்.பி. சந்தீஷ் பணியிடை நீக்கம் செய்து உத்தரவிட்டாா்.
மடப்புரம் பத்ரகாளியம்மன் கோயில் காவலாளி அஜித்குமாா் போலீஸாரால் அடித்துக் கொல்லப்பட்ட சம்பவம் பரபரப்பாகி வரும் நிலையில், 10 நாள்கள் கழித்து எஸ்.பி.யின் தனிப் பிரிவு காவலா் லிங்கசாமி பணியிடை நீக்கம் செய்யப்பட்ட தகவலை மாவட்ட காவல் துறை தற்போது வெளியிட்டிருப்பது குறிப்பிடத்தக்கது.
