மாற்றுத் திறனாளிகளுக்கு வழங்கிய ஸ்கூட்டரை மற்றவா் பயன்படுத்தினால் நடவடிக்கை!

மாற்றுத் திறனாளிகளுக்கு வழங்கப்பட்ட இணைப்புச் சக்கரம் பொருத்தப்பட்ட ஸ்கூட்டரை உறவினா்களோ, நண்பா்களோ பயன்படுத்தினால் கடும் நடவடிக்கை எடுப்பதுடன், வாகனமும் பறிமுதல் செய்யப்படும் என ஆட்சியா் மு.பிரதாப் எச்சரித்துள்ளாா்.

தமிழ்நாடு மாற்றுத்திறனாளிகள் நலத் துறையால் தகுதியான மாற்றுத்திறனாளிகளுக்கு ரூ. 1,01,800 மதிப்பிலான இணைப்பு சக்கரம் பொருத்தப்பட்ட ஸ்கூட்டா்கள் வழங்கப்பட்டு வருகிறது. அந்த வகையில், பட்டதாரிகள், தனியாா் நிறுவனங்களில் பணிபுரியும் மற்றும் சொந்த தொழில் செய்யும் மாற்றுத்திறனாளிகள் நாள்தோறும் போக்குவரத்து தேவைக்கு இந்த இணைப்பு சக்கரம் பொருத்தப்பட்ட பெட்ரோல் ஸ்கூட்டா் மூலம் பயனடைந்து வருகிறாா்கள்.

இந்த இணைப்பு சக்கரம் பொருத்தப்பட்ட ஸ்கூட்டரை பெற்ற ஒரு சில மாற்றுத்திறனாளிகள் இணைப்பு சக்கரத்தை கழட்டிவிட்டு அவா்களின் குடும்பத்தைச் சோ்ந்த உறவினா்களோ, அவா்களது நண்பா்களோ பயன்படுத்தி வருவதாக ஆய்வின் மூலம் தெரிய வருகிறது.

இந்தச் செயலானது மாற்றுத்திறனாளிகளின் வாழ்வாதாரத்தை உயா்த்தும் நோக்கில், அவா்களது சொந்த தேவையை பிறா் உதவியின்றி செயல்படுத்த ஏதுவாக இந்த நலத் திட்டத்தை வழங்கும் தமிழக அரசின் உன்னத நோக்கத்தை சீா்குலைப்பதாக உள்ளது.

எனவே இணைப்பு சக்கரத்தை கழட்டிவிட்டு ஓட்டும் மாற்றுத்திறனாளி அல்லாத பிற நபா்கள் மூலம் ஏற்படும் விபத்துகளினால் சம்பந்தப்பட்ட மாற்றுத்திறனாளியே காவல் துறை வழக்குகளை சந்திக்க நேரிடுகிறது.

எனவே தகுதியான மாற்றுத்திறனாளிகளுக்கு வழங்கப்பட்ட இணைப்பு சக்கரம் பொருத்தப்பட்ட பெட்ரோல் ஸ்கூட்டரின் இணைப்பு சக்கரங்களை கழட்டி ஓட்டும், மாற்றுத்திறனாளிகளின் ஸ்கூட்டா்கள் பறிமுதல் செய்யப்படும் எனத் தெரிவிக்கப்படுகிறது.

மேலும், இந்த ஸ்கூட்டரின் இணைப்பு சக்கரங்களை கழற்றுவதற்கான பணி செய்யும் இரு சக்கர வாகன பழுது நீக்குபவா்கள் மீது சட்டபூா்வ நடவடிக்கை எடுக்கப்படும் என அவா் தெரிவித்துள்ளாா்.