ஸ்ரீபெரும்புதூா் அடுத்த வெங்காடு பகுதியில் மின்கம்பத்தில் ஏறி பழுதை நீக்கும் பணியில் ஈடுபட்ட வடமாநில தொழிலாளி மின்சாரம் பாய்ந்து உயிரிழந்தாா். அவரை காப்பற்ற முயன்ற சக தொழிலாளா்கள் இருவா் பலத்த காயங்களுடன் மருத்துவமனையில் அனுமதிக்கப்பட்டு சிகிச்சை பெற்று வருகின்றனா்.
மேற்கு வங்க மாநிலத்தைச் சோ்ந்தவா் யூசப் (21). இவா் ஸ்ரீபெரும்புதூா் அடுத்த வெங்காடு பகுதியில் தங்கி தனியாா் தொழிற்சாலையில் ஒப்பந்த அடிப்படையில் பணியாற்றி வந்துள்ளாா். இந்த நிலையில், ஸ்ரீபெரும்புதூா் அதன் சுற்றுவட்டார பகுதிகளில் சனிக்கிழமை பலத்த மழை பெய்ததை தொடா்ந்து, வெங்காடு பகுதியில் மின்சாரம் துண்டிக்கப்பட்டு மீண்டும் விநியோகம் செய்யப்பட்டதாக தெரிகிறது.
இந்த நிலையில், யூசப் பணியாற்றும் தொழிற்சாலைக்கு மின்சாரம் வராததால், தன்னுடன் பணியாற்றும் சக தொழிலாளா்களுடன் தொழிற்சாலையின் வெளியே உள்ள மின்கம்பத்தில் ஏறி மின்வயரில் ஏற்பட்ட பழுதை நீக்கும் பணியில் யூசப் ஈடுபட்டுள்ளாா்.
அப்போது யூசப் மீது மின்சாரம் பாய்ந்து மின் கம்பத்திலேயே மயங்கி விழுந்துள்ளாா். இதனால் அவரை காப்பற்ற முயன்ற இரண்டு தொழிலாளா்கள் மீதும் மின்சாரம் பாய்ந்து தூக்கி வீசப்பட்டுள்ளனா். இதில் பலத்த காயம் அடைந்த யூசப் சம்பவ இடத்திலேயே உயிரிழந்தாா்.
மற்ற இரண்டு தொழிலாளா்களும் ஸ்ரீபெரும்புதூா் அரசு மருத்துவமனையில் அனுமதிக்கப்பட்டு சிகிச்சை பெற்று வருகின்றனா். இந்த சம்பவம் குறித்து ஸ்ரீபெரும்புதூா் போலீஸாா் வழக்குப் பதிவு செய்து விசாரித்து வருகின்றனா்.
