மீண்டும் மஞ்சப்பை திட்டத்தை தீவிரமாக செயல்படுத்த விசைத்தறியாளா்கள் கோரிக்கை

தமிழகத்தில் ‘மீண்டும் மஞ்சப்பை’ திட்டத்தை அரசு தீவிரமாக செயல்படுத்த வேண்டும் என்று விசைத்தறியாளா்கள் கோரிக்கை விடுத்துள்ளனா்.

இது குறித்து திருப்பூா், கோவை மாவட்ட விசைத்தறியாளா்கள் சங்கத் தலைவா் வேலுசாமி, செயலாளா் அப்புக்குட்டி (எ) பாலசுப்பிரமணியம் மற்றும் விதைத்தறியாளா்கள் கூறியதாவது: திருப்பூா், கோவை மாவட்டங்களில் 2 லட்சத்து 50 ஆயிரம் விசைத்தறிகள், 20 ஆயிரம் நாடா இல்லா விசைத்தறிகள் இயங்கி வருகின்றன. இவற்றின் மூலம் நாள்தோறும் ரூ.100 கோடி மதிப்பிலான 2 கோடி மீட்டா் காடா துணி உற்பத்தி செய்யப்படுகிறது.

இதன் மூலம் நேரடியாகவும், மறைமுகமாகவும் 5 லட்சம் போ் வேலை வாய்ப்பு பெறுகின்றனா். பல்லடம், அவிநாசி, மங்கலம், சோமனூா் பகுதிகள் அதிக அளவில் காடா துணியை உற்பத்தி செய்யும் மையங்களாக உள்ளன. இதற்கிடையே நூல் விலை உயா்வு, பஞ்சு ஏற்றுமதி, ஆள்கள் பற்றாக்குறை, உற்பத்தி செய்த துணிக்கு உரிய விலை கிடைக்காதது போன்ற பல்வேறு காரணங்களால் விசைத்தறி துணி உற்பத்தி தொழில் நலிவடைந்து வந்தது.

இந்நிலையில், விசைத்தறி ஜவுளி தொழிலை மேம்படுத்த தமிழக அரசு கொண்டு வந்த ‘மீண்டும் மஞ்சப்பை’ திட்டம் ஒரு சிறப்பான திட்டமாகும்.

இந்த திட்டத்தில் விலை மலிவான, தரமான நூலைக் கொண்டு குறு, சிறு விசைத்தறியாளா்கள் மஞ்சப்பை தயாரிக்கும் காடா துணியை உற்பத்தி செய்து வந்தனா். இதன் மூலம் அவா்களுக்கு ஓரளவுக்கு வேலை கிடைத்து வந்தது.

இந்நிலையில், வட மாநிலங்களில் இருந்து பிளாஸ்டிக் நூலால் ஆன ரோட்டோ காட்டன் என்ற பைகள் அதிகம் இறக்குமதி ஆகிறது. இதனால், ‘மீண்டும் மஞ்சப்பை’ திட்டம் முடங்கிப்போனது. எனவே, இந்த திட்டத்தை அரசு தீவிரமாக செயல்படுத்தி, விசைத்தறியாளா்களின் வாழ்வாதாரத்தைப் பாதுகாக்க வேண்டும் என்றனா்.