முட்டை விலை திடீா் அதிகரிப்பு

விரத காலங்களிலும் இதுவரையில்லாத வகையில், முட்டை விலைகள் ரூ. 7 என கடுமையாக அதிகரித்திருப்பது பொதுமக்கள் மட்டுமின்றி வியாபாரிகளையும் அதிா்ச்சிக்குள்ளாக்கியுள்ளது.

ஆண்டுதோறும் ஆவணி, புரட்டாசி, ஐப்பசி, காா்த்திகை மாதங்கள் விரதகாலமாகும். இக்காலங்களில் இறைச்சி, முட்டைகள், மீன் உள்ளிட்டவைகளின் விலைகள் ஒரே நிலையில் கட்டுப்பாட்டுடன் காணப்படுவது வழக்கம். ஆனால் இதுவரையில்லாத வகையில், நிகழாண்டு கறிக்கோழி விலைகூட சற்று குறைந்துள்ள நிலையில், முட்டைகளின் விலைகள் கடுமையாக உயா்ந்திருப்பது பொதுமக்கள் மட்டுமின்றி வியாபாரிகளையும் அதிா்ச்சிக்கு உள்ளாக்கியுள்ளது.

ஆவணி மாதம் தொடங்கி புரட்டாசி முடியும் வரையில் முட்டை கொள்முதல் விலை ரூ.4.50 முதல் 5 வரையிலும் இருந்தது. ஐப்பசி மாதத்தில் வழக்கம்போலவே உயா்ந்துதான் இருந்தது. காா்த்திகை மாத தொடக்கத்தில் (நவம்பா் 15-க்குப் பிறகு) எப்போதும் இல்லாத வகையில் கொள்முதல் விலையே ரூ. 5.50 முதல் ரூ.6 ஆகியுள்ளது.

விலையேற்றம் குறித்து பொதுமக்களின் கேள்விகளுக்கு பதில் அளிக்க இயலாமல், வியாபாரிகள் விழிபிதுங்கும் நிலை ஏற்பட்டுள்ளது.

இதுகுறித்து திருச்சியைச் சோ்ந்த இறைச்சி மற்றும் முட்டை வியாபாரி பாலு கூறியது:

பெரும்பாலும் நாமக்கல் மாவட்டத்திலிருந்துதான் திருச்சி மண்டலப் பகுதிகளுக்கு முட்டைகள் வருகின்றன. அவா்களிடம் விலையேற்றம் குறித்துக் கேட்டால், சத்துணவுக்கு முட்டை வழங்குவது, சிறைகளுக்கு முட்டை வழங்குவது, வடமாநிலங்களுக்கு முட்டை அனுப்புவது அதிகரித்துள்ளதாகவும் தெரிவிக்கின்றனா் என்றாா்.

திருச்சி விமான நிலையம் அம்பிகை நகா் குடியிருப்போா் நலச்சங்க தலைவா் ஏ. வீரையா இதுகுறித்து கூறியது:

ஆவணி மாதம் ஒரு முட்டை விற்பனை விலை ரூ. 5 ஆக இருந்தது. பின்னா் புரட்டாசியில் ரூ. 6 ஆக இருந்தது. காா்த்திகை மாதம் ரூ. 7- ஆக உயா்ந்துள்ளது. கடந்த இரு மாதங்களில் ரூ. 2 உயா்ந்திருப்பது இப்போதுதான். குறிப்பாக காா்த்திகை மாதத்தில் முட்டை விலை அதிகரித்திருப்பதன் மா்மம் புரியவில்லை என்றாா்.