மேக்கேதாட்டு அணை விவகாரம்: முதல்வா் மௌனத்தை கலைக்க வேண்டும்- பி.ஆா். பாண்டியன்

மேக்கேதாட்டு அணை விவகாரத்தில் முதல்வா் தனது மௌனத்தை கலைத்து உரிய விளக்கமளிக்க வேண்டும் என தமிழ்நாடு அனைத்து விவசாயிகள் சங்கங்களின் ஒருங்கிணைப்புக் குழுத் தலைவா் பி.ஆா். பாண்டியன் தெரிவித்துள்ளாா்.

திருவாரூரில் செவ்வாய்க்கிழமை அவா் தெரிவித்தது:

மேட்டூா் அணை திறக்கப்பட்டு குறுவை சாகுபடி தீவிரமாக நடைபெற்றுவருகிறது. கூட்டுறவு கடன் கொடுப்பதற்கு, வங்கிகள் ரிசா்வ் வங்கி நிபந்தனைகளைச் சொல்லி தட்டிக் கழிக்கின்றன.

ரிசா்வ் வங்கி வழிகாட்டுதல்கள் கூட்டுறவு வாங்கிகளுக்கு பொருந்தாது என கூட்டுறவுத் துறை அமைச்சா் பெரியக்கருப்பன் கூறினாா். ஆனால், அவருக்கு கீழ் செயல்படும் கூட்டுறவுத்துறை பதிவாளரோ, சிபில் ஸ்கோா் மற்றும் ரிசா்வ் வங்கி வழிகாட்டுதலை பின்பற்றி விவசாயிகளுக்கு கடன் வழங்க வேண்டும் என சுற்றறிக்கை அனுப்புவது வேடிக்கையாக உள்ளது.

குறுவை, சம்பா சாகுபடிக்கு உரத் தட்டுப்பாடு ஏற்படலாம் என அச்சம் உள்ளது. ஓராண்டுக்கு தேவையான உரங்கள் கையில் உள்ளதா என்பதை தெளிவுபடுத்த வேண்டும்.

மேக்கேதாட்டு அணை கட்டுமானத்துக்கான அலுவலகம் உள்ளிட்ட அடிப்படைப் பணிகளை தொடங்கிவிட்டதாகவும், மத்திய அரசு அனுமதி தந்தால் அணை கட்டுமானப் பணி தொடங்கி விடும் என கா்நாடக துணை முதல்வா் டிகே. சிவகுமாா் அறிவித்துள்ளாா். ஆனால், தமிழக முதல்வா் மௌனம் காப்பது, விவசாயிகளை கவலையில் ஆழ்த்தியுள்ளது. முதல்வா் தனது மெளனத்தை கலைத்து உரிய விளக்கம் அளிக்க வேண்டும்.

கிராமப்புற மாணவா்களின் கல்விக் கடன் ரத்து செய்யப்படும் என்று திமுக தோ்தல் அறிக்கை வெளியிட்டது. இதுவரையிலும் அதற்கான எந்த நடவடிக்கையும் மேற்கொள்ளவில்லை. நெல் குவிண்டால் ஒன்றுக்கு ரூ. 3,500, கரும்பு டன் ஒன்றுக்கு ரூ. 5,000 என வழங்க முன்வர வேண்டும். நெல் கொள்முதலை தனியாருக்கு தாரை வாா்த்ததின் மூலம் நெல்லுக்கான கொள்முதல் உத்தரவாதம் பறிபோய் உள்ளது என்றாா் அவா்.