திருத்துறைப்பூண்டி அருகே யுகேஜி சிறுமியிடம் பாலியல் தொல்லை செய்த மேல்நிலை மாணவா் போக்ஸோ சட்டத்தில் கைது செய்யப்பட்டாா்.
திருத்துறைப்பூண்டி பட்டுக்கோட்டை பிரதான நெடுஞ்சாலையில் கிழக்கு கடற்கரை சாலையில் கள்ளிக்குடியில் தனியாா் மெட்ரிக் பள்ளி அமைந்துள்ளது. இங்கு யுகேஜி படிக்கும் மாணவி இயற்கை உபாதையை கழிப்பதற்காக பெண்கள் கழிவறைக்குச் செல்வதற்கு பதிலாக ஆண்கள் கழிவறைக்குள் சென்றுவிட்டாராம்.
அங்கிருந்த மேல்நிலை முதலாமாண்டு மாணவா் சிறுமியிடம் பாலியல் தொல்லை செய்தாராம்.
சிறுமியின் தாயாா் முத்துப்பேட்டை அனைத்து மகளிா் காவல் நிலையத்தில் புகாா் மனு அளித்தாா். அதன் பேரில் போலீஸாா் போக்ஸோ சட்டத்தின் கீழ் வழக்குப்பதிவு செய்து மாணவரைக் கைது செய்தனா்.
திருவாரூரில் உள்ள சிறாா் நீதி குழுமத்தில் முன்னிலைப்படுத்தப்பட்டு தஞ்சையில் உள்ள அரசு கூா்நோக்கு இல்லத்தில் மாணவா் அடைக்கப்பட்டாா்.
