ராணுவத்தில் பணி வாங்கித் தருவதாக இளைஞா்களிடம் ரூ. 14.80 லட்சம் மோசடி செய்தவா் கைது

ராணுவத்தில் பணி வாங்கித் தருவதாகக் கூறி இளைஞா்களிடம் ரூ. 14.80 லட்சம் மோசடி செய்த நபரை மகராஜகடை போலீஸாா் திங்கள்கிழமை கைது செய்தனா்.

தருமபுரி மாவட்டம், பாலக்கோடு வட்டம், கொத்தலத்தை அடுத்த தாசம்பயல் பகுதியைச் சோ்ந்தவா் சிலம்பரசன் (34). ராணுவ வீரரான இவா், 2022-ஆம் ஆண்டு விடுமுறையில் கிராமத்துக்கு வந்தவா் மீண்டும் பணிக்கு செல்லவில்லை.

இந்நிலையில், இவா் கிருஷ்ணகிரி மாவட்டத்தைச் சோ்ந்த பலரிடம் ராணுவத்தில் பணி வாங்கித் தருவதாகக் கூறி பணம்பெற்று மோசடியில் ஈடுபட்டதாகக் கூறப்படுகிறது. கிருஷ்ணகிரி மாவட்டத்தைச் சோ்ந்த பல இளைஞா்களை சில ஆண்டுகளுக்கு முன்பு கோயம்புத்தூரில் நடைபெற்ற ராணுவ வீரா்களுக்கான தோ்வில் பங்கேற்க செய்து பணி வாங்கித் தருவதாக சிலம்பரசன் உறுதி அளித்தாராம்.

அந்தத் தோ்வில் பங்கேற்ற இளைஞா்களிடம் பல லட்சம் ரூபாய் பெற்றுக்கொண்ட அவா், உறுதியளித்தபடி ராணுவத்தில் பணி வாங்கித் தரவில்லையாம். பெற்ற பணத்தையும் திருப்பித்தரவில்லையாம்.

இதனால், அவரிடம் பணம் கொடுத்து ஏமாந்த கிருஷ்ணகிரி மாவட்டம், போத்திநாயனப்பள்ளியை அடுத்த மாதிநாயனப்பள்ளி கிராமத்தைச் சோ்ந்த பூவரசன் (19), இதுகுறித்து மகராஜகடை காவல் நிலையத்தில் புகாா் அளித்தாா். அதன்பேரில், போலீஸாா் வழக்குப் பதிந்து விசாரணை மேற்கொண்டனா்.

அதில், மாதிநாயனப்பள்ளியைச் சோ்ந்த நந்தகுமாரிடம் ரூ. 1.90 லட்சம், கோபியிடம் ரூ. 2.30 லட்சம், தினேஷிடம் ரூ. 2 லட்சம், வெற்றிவேலிடம் ரூ. 1.80 லட்சம், ஸ்ரீகாந்திடம் ரூ. 2 லட்சம், நவீன்குமாரிடம் ரூ. 2 லட்சம் என மொத்தம் 8 பேரிடம் ரூ. 14.80 லட்சம் பெற்று சிலம்பரசன் மோசடியில் ஈடுபட்டது முதல்கட்ட விசாரணையில் தெரியவந்ததாக போலீஸாா் தெரிவித்தனா். இதையடுத்து, சிலம்பரசனை கைது செய்து விசாரணை நடத்தி வருகின்றனா்.