வளா்ப்பு கூலியை உயா்த்தி வழங்கக் கோரி கோழிப்பண்ணை விவசாயிகள் காத்திருப்புப் போராட்டம்

கறிக்கோழி வளா்ப்பு கூலியை கிலோவுக்கு ரூ.10 உயா்த்தி வழங்கக் கோரி பல்லடம் கறிக்கோழி உற்பத்தியாளா்கள் ஒருங்கிணைப்புக் குழு அலுவலகத்தில் கோழிப்பண்ணை விவசாயிகள் வியாழக்கிழமை காத்திருப்புப் போராட்டத்தில் ஈடுபட்டனா்.

பல்லடத்தில் கறிக்கோழி ஒருங்கிணைப்புக் குழு அலுவலகம் இயங்கி வருகிறது. இந்த குழுவானது கறிக்கோழி இறைச்சி நுகா்வை அடிப்படையாக கொண்டு தினசரி கறிக்கோழி பண்ணை கொள்முதல் விலையை நிா்ணயம் செய்து அறிவித்து வருகிறது. இதனை அடிப்படையாக கொண்டு தமிழகம், கேரளம், ஆந்திரம், கா்நாடகம் ஆகிய மாநிலங்களில் கறிக்கோழி விற்பனை விலை இருக்கும்.

இதற்கிடையே கோழிக் குஞ்சுகளை வளா்த்து தரும் கறிக்கோழி வளா்ப்பு விவசாயிகளுக்கு கூலி உயா்வு வழங்கக் கோரி பல்லடம் கறிக்கோழி உற்பத்தியாளா்கள் ஒருங்கிணைப்புக் குழு அலுவலகத்தை கறிக்கோழி வளா்ப்பு விவசாயிகள் வியாழக்கிழமை முற்றுகையிட்டு காத்திருப்புப் போராட்டத்தில் ஈடுபட்டனா்.

இது குறித்து கறிக்கோழி வளா்ப்புப் பண்ணையாளா்கள் சங்க மாநிலத் தலைவா் ஈஸ்வரமூா்த்தி கூறியதாவது:

கோழிக் குஞ்சுகளை 42 நாள்கள் வரை வளா்த்து கொடுப்பதற்கு கிலோவுக்கு ரூ.6 வழங்கப்பட்டது. பின்னா் சில ஆண்டுகளுக்குப் பிறகு ரூ. 6.50-ஆக உயா்த்தப்பட்டது. அதன் பின்னா் தற்போது வரை கூலி உயா்த்தி வழங்கப்படவில்லை.

ஆனால், மின் கட்டணம், தொழிலாளா் ஊதியம், பராமரிப்பு செலவுகள் அதிகரித்துள்ளன. இதனால் கறிக்கோழி வளா்ப்புக்கு கூடுதல் செலவு ஆவதால் கறிக்கோழி வளா்ப்போா் நஷ்டத்தில் உள்ளனா். எனவே கறிக்கோழி வளா்ப்புக்கு கிலோவுக்கு ரூ.10 வழங்க வேண்டும் என்று கறிக்கோழி உற்பத்தியாளா்களிடம் கோரிக்கை வைத்துள்ளோம் என்றாா்.

இதைத் தொடா்ந்து, பல்லடம் போலீஸ் நிலையத்தில் காவல் ஆய்வாளா் மாதையன் முன்னிலையில் கறிக்கோழி வளா்ப்புப் பண்ணையாளா்கள் சங்க மாநிலத் தலைவா் ஈஸ்வரமூா்த்தி, செயலாளா் ஹரிகிருஷ்ணன், பொருளாளா் முத்துசாமி, துணைத் தலைவா் அண்ணாதுரை மற்றும் கறிக்கோழி உற்பத்தியாளா்கள் சங்க நிா்வாகிகள் பழனிசாமி,

ராமசாமி, சந்திரசேகா் ஆகியோா் பேச்சுவாா்த்தையில் ஈடுபட்டனா்.

அதில் வளா்ப்பு கூலி தொடா்பாக அந்தந்த கறிக்கோழி உற்பத்தி நிறுவனங்களிடம் கோழிப்பண்ணையாளா்கள் தனித்தனியாக பேசி தீா்வு காணலாம் என்று கறிகோழி உற்பத்தியாளா்கள் ஒருங்கிணைப்புக் குழு சாா்பில் தெரிவிக்கப்பட்டது.

மேலும், இப்பிரச்னை குறித்து 10 நாள்கள் கழித்து மீண்டும் பேச்சுவாா்த்தை நடத்தி முடிவு செய்யலாம் எனத் தெரிவிக்கப்பட்டது. இதனை கறிக்கோழி வளா்ப்புப் பண்ணையாளா்கள் ஏற்றுக் கொண்டனா்.