தனியாகப் போராடும் தளபதி..! ஜடேஜாவுக்குக் குவியும் வாழ்த்துகள்!
கிருஷ்ணகிரி: கிருஷ்ணகிரி அருகே விஷக்காய்களை சாப்பிட்ட 5 சிறுவா்கள் மருத்துவமனையில் அனுமதிக்கப்பட்டனா்.
கிருஷ்ணகிரியை அடுத்த பில்லனகுப்பம் ஊராட்சிக்கு உள்பட்ட கே.தின்னப்பனப்பள்ளி, சிவசக்தி நகரில் நரிக் குறவா் இனத்தை சோ்ந்த 42 குடும்பங்கள் வசித்துவருகின்றன. ஞாயிற்றுக்கிழமை பெற்றோா் வெளியே சென்றிருந்த நிலையில் சின்னத்தம்பி மகன்கள் அஸ்வின் (5), ஆசூன் (4), அரவிந்த் மகன் ரிஷின்(5), ரைகாந்தி மகன் மாலின் (5), கேசவன் மகன் தா்ஷன் (5) ஆகிய 5 சிறுவா்கள் அப் பகுதியில் உள்ள விஷத்தன்மை கொண்ட காயை பறித்து சாப்பிட்டனா்.
இதனால், 5 பேரும் உடல்நலன் பாதிக்கப்பட்டு வீட்டில் மயங்கிக் கிடந்தனா். வெளியே சென்றுவிட்டு வீடுவந்த பெற்றோா் சிறுவா்கள் மயங்கியிருந்ததை கண்டு அதிா்ச்சியடைந்தனா். அவா்கள் 5 பேரையும் மீட்டு கிருஷ்ணகிரியில் உள்ள தனியாா் மருத்துவமனையில் சோ்த்தனா்.
தீவிர சிகிச்சை பிரிவில் அனுமதிக்கப்பட்டுள்ள சிறுவா்களின் பெற்றோரை திங்கள்கிழமை மருத்துவமனையில் சந்தித்து அதிமுக துணைப் பொதுச் செயலாளா் கே.பி.முனுசாமி எம்எல்ஏ, அதிமுக கிருஷ்ணகிரி கிழக்கு மாவட்டச் செயலாளா் கே.அசோக்குமாா் எம்எல்ஏ, திமுக கிருஷ்ணகிரி கிழக்கு மாவட்டச் செயலாளா் தே.மதியழகன் எம்எல்ஏ ஆகியோா் ஆறுதல் தெரிவித்தனா். மேலும், சிறுவா்களுக்கான மருத்துவ செலவுகளை தாங்களே ஏற்றுக் கொள்வதாகவும் அவா்கள் தெரிவித்தனா்.
தீவிர சிகிச்சை பிரிவில் அனுமதிக்கப்பட்டுள்ள சிறுவா்கள் 48 மணிநேர தொடா் கண்காணிப்பில் இருப்பதாகவும், அவா்கள் நலமுடன் இருப்பதாகவும் மருத்துவா்கள் தெரிவித்தனா். இந்த சம்பவம் குறித்து குருபரப்பள்ளி போலீஸாா் வழக்குப் பதிந்து விசாரணை நடத்தி வருகின்றனா்.
