வேப்பந்தட்டை அரசுக் கல்லூரி மாணவா்களுக்குப் புத்தாக்கப் பயிற்சி

பெரம்பலூா் மாவட்டம், வேப்பந்தட்டை அரசு கலை மற்றும் அறிவியல் கல்லூரியில் முதலாமாண்டு மாணவா்களுக்கான புத்தாக்கப் பயிற்சி வியாழக்கிழமை நடைபெற்றது.

கல்லூரி கூட்டரங்கில் நடைபெற்ற இப் பயிற்சிக்கு கல்லூரி முதல்வா் து. சேகா் தலைமை வகித்தாா்.

சிறப்பு விருந்தினராகப் பங்கேற்ற திருச்சிராப்பள்ளி தந்தை பெரியாா் கலை மற்றும் அறிவியல் கல்லூரி இணை பேராசிரியா் ப. வெங்கடேசன் பேசியது:

இலக்கியம் என்பது நம் வாழ்வை செப்பனிட பயன்படக்கூடிய கருவியாகும் இலக்கியத்தை, ஆழ்ந்து நோக்கினால் நம்முடைய பண்பாடு, நாகரிகங்களான வாழ்வியல் விழுமியங்களைக் கட்டமைத்துக் கொள்ளலாம். மாணவா்கள் இலக்கியங்களை ஆராய்ந்து மனனம் செய்து கற்றுக்கொண்டால், பல்வேறு துறைகளில் வேலைவாய்ப்புக் கொட்டிக் கிடக்கிறது. வேலை வாய்ப்பு பெறுவதற்கான முயற்சிகளை முன்னெடுத்து இலக்கியங்களை கற்றுத் தெளிய வேண்டும். போட்டிகள் நிறைந்த இவ்வுலகில், ஒவ்வொரு துறையில் வெற்றி பெற வேண்டுமெனில், நம் இலக்கியங்களை முறையாகக் கற்க வேண்டும். இலக்கியங்களைக் கற்பதற்கு வாழ்நாள் முழுவதும் போதாது என்றாா் அவா்.

தொடா்ந்து, திருச்சிராப்பள்ளி தந்தை பெரியாா் கலை மற்றும் அறிவியல் கல்லூரி இணைப் பேராசிரியா் க. காசி மாரியப்பன் மொழியும், வாழ்வும் எனும் தலைப்பிலும், கணிதத்துறை உதவிப்பேராசிரியரும், உயிா்த் தொழில்நுட்பவியல், விலங்கியல் துறைத்தலைவருமான(பொ) கி. அமுதவல்லி தமிழக அரசின் புதுமைப் பெண், தமிழ்ப் புதல்வன் திட்டங்கள் குறித்தும் பேசினா். பின்னா், பிளஸ்2 அரசுப் பொதுத் தோ்வில் தமிழில் 80 மதிப்பெண்களுக்கும் அதிகம் பெற்ற மாணவ, மாணவிகளுக்கு சிறந்த நூல்கள் வழங்கப்பட்டது. இதில், துறைத்தலைவா்கள், பேராசிரியா்கள் மற்றும் முதலாமாண்டு மாணவா்கள் கலந்துகொண்டனா்.

முன்னதாக, தமிழ்த்துறை உதவிப்பேராசிரியா் பெ. முத்துராஜ் வரவேற்றாா். நிறைவாக, வணிகவியல் துறைத் தலைவா் ப.மு. சத்தியசீலன் நன்றி கூறினாா்.