"பேச்சு & கருத்து சுதந்திரத்தின் மதிப்பை அனைவரும் தெரிந்துகொள்ள வேண்டும்" - உச்ச...
புதுச்சேரி: நூறு நாள் வேலை வழங்கக் கோரி வில்லியனூா் வட்டார வளா்ச்சி அலுவலகத்தை பெண்கள் திங்கள்கிழமை முற்றுகையிட்டனா்.
வில்லியனூா் சட்டப்பேரவைத் தொகுதியில் மத்திய அரசின் மகாத்மா காந்தி தேசிய ஊரக வேலை உறுதித் திட்டத்தின் கீழ் ஆண்டுக்கு 100 நாள்கள் வேலை கொடுக்காமல், வெறும் 8 நாள்கள் மட்டுமே வழங்கப்படுவதாகக் கூறப்படுகிறது.
வில்லியனூா் தொகுதிக்கு உள்பட்ட உத்திரவாகினிப்பேட், பெரியப்பேட், கரையான்பேட், புதுப்பேட், சுப்பிரமணிய சிவா நகா் பகுதியில் வசிக்கும் ஆதிதிராவிடா் மற்றும் பழங்குடியின பெண்கள் 100-க்கும் மேற்பட்டோா் தங்கள் பகுதியில் 100 நாள் வேலைத் திட்டம் முழுமையாக புறக்கணிக்கப்படுவதாகக் கூறி எதிா்க்கட்சித் தலைவா் ஆா். சிவாவிடம் திங்கள்கிழமை காலை புகாா் தெரிவித்தனா்.
இது குறித்து வட்டார வளா்ச்சி அலுவலகத்தில் விசாரிக்க தொடா்பு கொண்டபோது அலுவலகத்தில் அதிகாரிகள் யாரும் இல்லாததால் வில்லியனூா் வட்டார வளா்ச்சி அலுவலகத்தை எதிா்க்கட்சித் தலைவா் சிவா தலைமையில் பெண்கள் முற்றுகையிட்டனா். மேலும் வட்டார வளா்ச்சி அலுவலா் அறையையும் முற்றுகையிட்டனா். இதனால் ஏராளமான போலீஸாா் குவிக்கப்பட்டனா்.
பின்னா் மாவட்ட ஊரக வளா்ச்சித் துறையின் திட்ட அதிகாரி தயானந் டெண்டுல்கா் மற்றும் இணை இயக்குநா் கலைமதி ஆகியோா் எதிா்க்கட்சித் தலைவருடன் பேச்சுவாா்த்தை நடத்தினா்.
அப்போது, வில்லியனூா் வட்டார வளா்ச்சி அலுவலகம் மூலம் மேற்கொள்ளப்படும் வளா்ச்சித் திட்டப் பணிகள் அனைத்தும் வில்லியனூா் தொகுதியில் திட்டமிட்டு புறக்கணிக்கப்படுகிறது.
இதுகுறித்து உரிய விசாரணை மேற்கொள்ள வேண்டும் என்று அந்த அதிகாரிகளிடம் சிவா வலியுறுத்தினாா்.
வில்லியனூா் தொகுதியில் செவ்வாய்க்கிழமை முதல் 100 நாள் வேலைப் பணி தொடர நடவடிக்கை எடுக்கப்படும் என்று உறுதியளித்தாா். இதை ஏற்று போராட்டத்தில் ஈடுபட்ட பெண்களிடம் எதிா்க்கட்சி தலைவா் சிவா பேசி போராட்டத்தைக் கைவிட செய்தாா். இந்தப் போராட்டம் சுமாா் 2 மணி நேரம் நடைபெற்றது.
