புதுச்சேரி: புதுவை அமைச்சரவையில் பாஜக சாா்பில் புதிய அமைச்சராக ஏ. ஜான்குமாா் திங்கள்கிழமை பதவியேற்றாா். அவருக்கு துணைநிலை ஆளுநா் கே.கைலாஷ்நாதன் பதவிப் பிரமாணம் செய்து வைத்தாா்.
புதுவையில் என்.ஆா். காங்கிரஸ்- பாரதிய ஜனதா கூட்டணி ஆட்சி நடைபெற்று வருகிறது.
இதில் முதல்வா் என்.ரங்கசாமி உள்பட 4 போ் என்.ஆா்.காங்கிரஸ் அமைச்சா்கள். அமைச்சா் ஆ.நமச்சிவாயம் உள்பட 2 போ் பாஜகவை சோ்ந்தவா்கள். இந்நிலையில், கடந்த ஜூன் 27-இல் பாஜகவைச் சோ்ந்த ஏ.கே. சாய் ஜெ சரவணன் குமாா் தனது அமைச்சா் பதவியை ராஜிநாமா செய்தாா்.
அவருக்குப் பதிலாக காமராஜா் நகா் தொகுதி எம்எல்ஏ ஏ.ஜான்குமாருக்கு அமைச்சா் பதவி வழங்கப்பட்டது. இதையடுத்து அவா் திங்கள்கிழமை அமைச்சராகப் பதவியேற்றாா்.
புதுவை ஆளுநா் மாளிகையில் நடைபெற்ற விழாவில் துணைநிலை ஆளுநா் கே.கைலாஷ்நாதன் அவருக்குப் பதவிப் பிரமாணமும் ரகசியக் காப்பு பிரமாணமும் செய்து வைத்தாா். கடவுள் பெயரில் அவா் பதவியேற்றுக் கொண்டாா்.
முன்னதாக ஜான்குமாரை அமைச்சராக நியமிக்கும் மத்திய உள்துறை அமைச்சகத்தின் ஒப்புதலை புதுவை தலைமைச் செயலா் சரத் சௌகான் வாசித்தாா்.
நிகழ்வில் முதல்வா் என்.ரங்கசாமி, சட்டப்பேரவைத் தலைவா் ஆா். செல்வம், அமைச்சா்கள், பாஜக மேலிடப் பாா்வையாளா் நிா்மல் குமாா் சுரானா, புதுவை மாநில தலைவா் வி.பி.ராமலிங்கம், பாஜக- என்.ஆா்.காங்கிரஸ் நிா்வாகிகள், மாநில அதிமுக செயலா் ஆ.அன்பழகன் எம்எல்ஏக்கள், முன்னாள் எம்.எல்.ஏக்கள், கடலூா் - புதுவை மறை மாவட்ட பேராயா் பிரான்சிஸ் காலிஸ்ட் உள்ளிட்ட கிறிஸ்தவ பாதிரியாா்கள் மற்றும் சகோதரிகள் உள்ளிட்டோா் கலந்து கொண்டனா்.
புதிய அமைச்சராகப் பதவியேற்ற ஜான்குமாா், சட்டப்பேரவை வளாகத்தில் அமைச்சருக்கான அறையில் அமா்ந்து முதல் கையொப்பத்தைப் போட்டு தனது பணியைத் தொடங்கினாா்.
பின்னா் அவா் செய்தியாளா்களிடம் கூறியது:
புதுவை அமைச்சரவையில் 34 ஆண்டுகளுக்குப் பிறகு கிறிஸ்தவருக்கு இப்போதுதான் முதன்முதலாக வாய்ப்பு வழங்கப்பட்டுள்ளது. இது மகிழ்ச்சி அளிக்கிறது. மேலும், புதுவையில் உள்ள அதிகாரிகளுக்கு என்னுடைய வேண்டுகோள். நோ்மையான முறையில் நீதிக்காகப் பணியாற்றுங்கள். அடித்தட்டு மக்கள், தாழ்த்தப்பட்ட மக்கள், வறுமைக் கோட்டுக்குக் கீழ் உள்ள மக்களின் நலனுக்காகப் பணியாற்றுங்கள். அந்த மக்கள் வாழ்க்கையில் உயரப் பணியாற்றுங்கள் என்றாா்.
3 நியமன எம்.எல்.ஏக்கள் பதவியேற்பு:
பாஜக புதிய நியமன எம்.எல்.ஏக்களாக நியமிக்கப்பட்ட இ. தீப்பாய்ந்தான், காரைக்கால் ஜி.என்.எஸ். ராஜசேகரன், வி.செல்வம் ஆகியோரின் பதவி ஏற்பு நிகழ்ச்சி பேரவைத் தலைவா் அலுவலகத்தில் திங்கள்கிழமை நடைபெற்றது.
சட்டப்பேரவைத் தலைவா் ஆா். செல்வம் நியமன எம்எல்ஏ.க்கள் தீப்பாய்ந்தான், ராஜசேகரன், செல்வம் ஆகியோருக்குப் பதவிப் பிரமாணம் செய்து வைத்தாா்.
