576 சுய உதவிக் குழுக்களுக்கு ரூ.80 கோடி வங்கிக் கடன்: திருப்பத்தூா் ஆட்சியா்

திருப்பத்தூா் மாவட்டத்தில் இதுவரை 576 சுய உதவிக்குழுக்களுக்கு ரூ.80 கோடி வங்கிக் கடன் வழங்கப்பட்டுள்ளது என ஆட்சியா் க.சிவசௌந்திரவல்லி தெரிவித்தாா்.

ஊரக வளா்ச்சி மற்றும் ஊராட்சித்துறையின் கீழ் தமிழ்நாடு மகளிா் மேம்பாட்டு நிறுவனத்தின் சாா்பில் துணை முதல்வா் உதயநிதி ஸ்டாலின் புதன்கிழமை தமிழகம் முழுதும் உள்ள மகளிா் சுய உதவி குழுக்களுக்கு வங்கிக் கடன் மற்றும் நலத்திட்ட உதவிகளை சென்னையில் இருந்து காணொலி வாயிலாக வழங்கி தொடங்கி வைத்தாா்.

ஜோலாா்பேட்ைடையில் நடைபெற்ற நிகழ்ச்சிக்கு ஆட்சியா் க.சிவசௌந்திரவல்லி தலைமை வகித்தாா். எம்எல்ஏ அ.நல்லதம்பி முன்னிலை வகித்தாா். நிகழ்ச்சியில் ஊரகம் மற்றும் நகா்புற பகுதிகளில் உள்ள 483 மகளிா் சுய உதவிக்குழுக்களுக்கு ரூ.49.14 கோடி கடனுதவி வழங்கப்பட்டது.

ஆட்சியா் க. சிவசௌந்திரவல்லி பேசியது:

மாவட்டத்தில் ஊரக மற்றும் நகா்ப்புற பகுதிகளில் 7,721 மகளிா் சுய உதவி குழுக்கள் இயங்கி வருகின்றன. இக்குழுக்களில் 1,01,673 பெண்கள் உறுப்பினா்களாக இணைந்து பல்வேறு வாழ்வாதார மேம்பாட்டு திட்டத்தின் மூலம் பயன் பெறுகின்றனா்.

இந்த நிதியாண்டில் 483 மகளிா் சுய உதவி குழுக்களை சோ்ந்த 5,535 பயனாளிகளுக்கு ரூ.49.14 கோடி வங்கி கடன் மற்றும் நலத்திட்ட உதவிகள் வழங்கப்பட உள்ளன. நிகழாண்டில் மொத்தம் 576 சுய உதவி குழுக்களுக்கு ரூ.80 கோடி வரை வங்கி கடன் பெற்று வழங்கப்பட்டுள்ளது என்றாா்.

எம்எல்ஏ ந. நல்லதம்பி பேசியது: மகளிா் உரிமைத்தொகை திட்டத்தின் வாயிலாக மாதம் ரூ.1,000 வழங்கப்பட்டு வருகிறது. பள்ளி மாணவ மாணவிகள் அரசு பள்ளியிலிருந்து உயா்கல்வி பயில்வதற்காக கல்லூரிக்கு செல்லும்போது, மாதம் ரூ.1,000 புதுமைப்பெண் மற்றும் மாணவா்களுக்கு தமிழ் புதல்வன் திட்டத்தின் கீழ் வழங்கப்பட்டு வருகிறது.

இதுபோன்ற பல்வேறு திட்டங்களை முதல்வா் செயல்படுத்தி வருகிறாா். திருப்பத்தூா் மாவட்டத்துக்கு முதல்வா் வருகை புரிந்து, 15,000 பேருக்கு பட்டா வழங்க உள்ளாா். கடனை வட்டியுடன் திருப்பிச் செலுத்தக்கூடியவா்கள் மகளிா் சுய உதவி குழுக்கள் தான். மாநில அளவில் கபடி போட்டியில் நமது சுய உதவிக்குழுவினா் இரண்டாம் பரிசு பெற்றுள்ளனா் என்றாா்.

நிகழ்ச்சியில் மகளிா் திட்ட இயக்குநா் தனபதி, ஒன்றிய குழு தலைவா்கள் சத்யா சதீஷ்குமாா், விஜயா அருணாச்சலம், திருமதி திருமுருகன், உதவி திட்ட அலுவலா் திருமேனி, உள்ளாட்சி பிரதிநிதிகள் மற்றும் துறை அலுவலா்கள் கலந்து கொண்டனா்.