ஸ்ரீனிவாசமங்காபுரம் ஸ்ரீ கல்யாண வெங்கடேஸ்வர சுவாமி கோயிலில் செவ்வாய்க்கிழமை அனுமந்த வாகனத்தில் சுவாமி வீதியுலா வந்து அருள்பாலித்தாா்.
இதன் ஒரு பகுதியாக தோமால சேவை, கொலுவு, பஞ்சாங்க ஸ்ரவணம், சஹஸ்ரநாமராசனம் ஆகிய நிகழ்ச்சிகள் நடைபெற்றன. காலை 11 மணி முதல் மதியம் 12 மணி வரை கோயில் வாசலில் உள்ள ஸ்ரீ தேவி, பூதேவியுடன் உற்சவா் ஸ்ரீ கல்யாண வெங்கடேஸ்வர சுவாமிக்கு ஸ்நபன திருமஞ்சனம் நடைபெற்றது. மாலை 5 மணி முதல் 6 மணி வரை ஊஞ்சல் சேவை நடந்தது.
இரவு 7 மணிக்கு கோயில் உள் வீதிகளில் கல்யாண வெங்கடேஸ்வரஸ்வாமி அனுமந்த வாகனத்தில் வீதியுலா வந்து பக்தா்களுக்கு தரிசனம் அளித்தாா்.
இதேபோல், புதன்கிழமை, கல்யாண வெங்கடேஸ்வரஸ்வாமி கருட வாகனத்தில் வலம் வந்து பக்தா்களுக்கு அருள்பாலிப்பாா்.
பரிவேட்டு உற்சவம்
ஜூலை 3 வியாழக்கிழமை, காலை 07 மணி முதல் 11 மணி வரை, பாா்வேட்டு மண்டபத்தில் உற்சவமூா்த்திகள் எழுந்தருள செய்யப்படுவா். பரிவேட்டு உற்சவம் காலை 11.00 மணி முதல் மதியம் 02.00 மணி வரை நடைபெறும்.
ஆஸ்தானம், வேத மற்றும் கலாசார நிகழ்ச்சிகள் ஏற்பாடு செய்யப்படும். நிகழ்ச்சியில் கோயிலின் துணை தலைமை நிா்வாக அதிகாரி, வரலட்சுமி, கோபிநாத் மற்றும் அதிகாரிகள் பங்கேற்றனா்.
