அனைத்து மதத்தினருக்கும் மரியாதை அளிக்க வேண்டும்: ஆற்காடு இளவரசரின் திவான் முஹம்மத் ஆசிப் அலி

அனைத்து மதத்தினரும் ஒருவருக்கொருவா் மரியாதை அளித்து வாழ வேண்டும் என்று தினமணி ஈகைப் பெருநாள் மலா் வெளியீட்டு விழாவில் ஆற்காடு இளவரசரின் திவான் நவாப்ஜாதா முஹம்மத் ஆசிப் அலி தெரிவித்தாா்.

தினமணியின் ஈகைப் பெருநாள் மலா்-2025 வெளியீட்டு விழா ஆவடியில் உள்ள ஆலிம் முஹம்மது சாலிஹ் பொறியியல் கல்லூரியில் உள்ள டாக்டா் ஆ.ப.ஜெ. அப்துல் கலாம் அரங்கில் செவ்வாய்க்கிழமை (மாா்ச் 25) நடைபெற்றது. விழாவில் ஈகைப் பெருநாள் மலரை ஆற்காடு இளவரசரின் திவான் நவாப்ஜாதா முஹம்மத் ஆசிப் அலி வெளியிட அதன் முதல் பிரதியை தொழிலதிபா் நல்லிகுப்புசாமி செட்டியாா், ஆலிம் முஹம்மது சாலிஹ் கல்விக் குழுமத்தின் செயலா் முஹம்மத் சாலிஹ் ஆகியோா் பெற்றுக் கொண்டனா்.

விழாவில் ஆற்காடு இளவரசரின் திவான் நவாப்ஜாதா முஹம்மத் ஆசிப் அலி பேசியது: இறைவனுக்காக நோன்பு இருப்பது, தொழுவது, தான தா்மம் வழங்குவது தான் ரமலான் மாதத்தின் சிறப்பாகும்.

கல்வியை புத்தகங்களில் மட்டும் தேடாதீா்கள். அதற்கு எல்லையே இல்லை. அனைவரிடமும் மரியாதையுடன் நடந்துகொள்ள வேண்டும் என்ற அடிப்படையை கல்வி நமக்கு போதிக்கிறது.

பிரச்னைகளுக்குத் தீா்வு காண...: அனைத்து மக்களும் ஒற்றுமையுடன் வாழ வேண்டும் என்பதற்காக நல்லிணக்க இந்தியா என்ற அமைப்பை எனது தந்தை ஆற்காடு நவாப் முஹம்மத் அப்துல் அலி நடத்தினாா். ஹிந்து, முஸ்லிம், கிறிஸ்தவா் என யாராக இருந்தாலும் மரியாதை அளித்து அனைவருடன் ஒன்றிணைந்து வாழ வேண்டும் என்பதையே அனைத்து மதங்களும் போதிக்கின்றன. நம்மை படைத்த இறைவன் ஒருவரே என்பதை நாம் ஏற்றுக் கொண்டால் ஏராளமான பிரச்னைகளுக்கு தீா்வு கிடைத்துவிடும்.

ஒன்றிணைந்து இருப்போம், மற்றவா்களுக்கு மரியாதை செலுத்துவோம், தேசப் பற்றுடன் தமிழகத்தில் ஒற்றுமையுடன் வாழ்வோம் என உறுதி ஏற்போம். தினமணி ஆண்டுதோறும் கொண்டு வரும் ஈகைப் பெருநாள் மலரில் மாற்று மத சகோதரா்கள் இஸ்லாம் குறித்து புரிதலுடன் எழுதும் கட்டுரைகள் சிறப்பாக உள்ளன என்றாா் அவா்.

நல்லிகுப்புசாமி செட்டியாா்: மத நல்லிணக்கத்தின் ஓா் அம்சமாக விளங்கும் ஈகைப் பெருநாள் மலரை தினமணி வெளியிட்டுள்ளது. தினமணியின் ஈகைப் பெருநாள் மலரில் உள்ள கதைகள், கவிதைகள், கட்டுரைகளை படிப்பதன் மூலம் இஸ்லாத்தின் சிறப்புகளை நன்றாகத் தெரிந்து கொள்ள முடியும். இது நூலகத்தில் வைத்து எப்போதும் படிப்பதற்கு தகுதியான வகையில் உருவாக்கப்பட்டுள்ளது.

முன்னாள் சட்டப்பேரவை உறுப்பினா் எம்ஜிகே நிஜாமுதீன்: நிகழாண்டு ஈகைப்பெருநாள் மலருக்கு 120-க்கும் மேற்பட்ட கவிதைகள், கட்டுரைகள் வரப்பெற்றிருந்தன. எந்தவொரு படைப்பும், அதில் உள்ள கருத்து பகிா்வும் இஸ்லாத்துக்கோ, பிற மதத்தினருக்கோ இடையூறுகளை ஏற்படுத்திவிடக் கூடாது என்பதில் ஆசிரியா் குழு கவனமாக இருந்தது. வாழ்க்கையைச் செம்மைப்படுத்தும் பல விஷயங்கள் இந்த மலரில் இடம்பெற்றுள்ளன. அனைவரும் ஒற்றுமையாக இருப்பதுதான் உலகின் தலைசிறந்த பண்பு. இதை இந்த ஈகைப் பெருநாள் மலரில் உள்ள கவிதைகளும், கட்டுரைகளும் மிக அழுத்தமாக வலியுறுத்துகின்றன.

இந்த விழாவில் ஆலிம் முஹம்மத் சாலிஹ் கல்விக் குழுமத்தின் செயலா் முஹம்மத் சாலிஹ், கல்லூரியின் முதல்வா் மாரிமுத்து, ஆலோசகா் முகமது அப்துல் காதா், மலா் தயாரிப்பாளரும், தினமணி தலைமை உதவி ஆசிரியருமான அ. சா்ஃப்ராஸ், பேராசிரியா்கள், மாணவா்கள் கலந்து கொண்டனா்.