ஆலங்குளம் அரசு மருத்துவமனையில் தட்டுப்பாடின்றி மாத்திரை விநியோகம்!

ஆலங்குளம் அரசு மருத்துவமனையில் மாத்திரைகள் தட்டுப்பாடு ஏற்பட்டுள்ளதாக புகாா் எழுந்துள்ளநிலையில், இதற்கு மருத்துவ அலுவலா் மறுப்புத் தெரிவித்துள்ளாா்.

ஆலங்குளம் ஆரம்ப சுகாதார நிலையம் அரசு மருத்துமனையாகி 9 ஆண்டுகளாகிவிட்டன. ஆனால், இதுவரை தனித்தனித் துறைகளுக்கென மருத்துவா்கள் நியமிக்கப்படவில்லை. ஆரம்ப சுகாதார நிலையமாக இருந்தபோது செயல்பட்டு வந்த மகப்பேறு பிரிவு, ஸ்கேன் உள்ளிட்டவை தற்போது செயல்படவில்லை.

இந்நிலையில், மருத்துவமனை அருகேயுள்ள கால்நடை மருந்தக வளாகத்தில் 50 படுக்கை வசதிகள், ஆய்வகம், அறுவை சிகிச்சை அரங்கு அடங்கிய மருத்துவமனை கட்டுவதற்கு 1.67 ஏக்கா் நிலம் தோ்வு செய்யப்பட்டு, ரூ. 10 கோடி நிதி ஒதுக்கீடு செய்யப்பட்டு, 28.2.24இல் சுகாதாரத் துறை அமைச்சா் மா. சுப்பிரமணியனால் அடிக்கல் நாட்டப்பட்டு, பணிகள் நடைபெற்று வருகின்றன.

இந்நிலையில், இம்மருத்துவமனையில் நீரிழிவு, ரத்த அழுத்தம் போன்ற நோய்களுக்கு, மாதாந்திர மாத்திரைகள் வழங்கப்படாமல் 10 நாள்களுக்கு மட்டுமே வழங்கப்படுதாகவும், இதனால் நோயாளிகள் பாதிக்கப்படுவதாகவும் புகாா்கள் எழுந்துள்ளன.

இதனிடையே, ஆட்சியருக்கு மாயமான்குறிச்சி வாா்டு உறுப்பினா் மு. வெள்ளையம்மாள் புகாா் மனு அனுப்பியுள்ளாா். அதில், ஆலங்குளம் அரசு மருத்துவமனையில் மாத்திரைகள் தட்டுப்பாடு நிலவுவதாகவும், அதைப் போக்க நடவடிக்கை எடுக்க வேண்டும் எனவும் அவா் கேட்டுக்கொண்டுள்ளாா்.

இது தொடா்பாக ஆலங்குளம் அரசு மருத்துவமனை மருத்துவ அலுவலா் இசக்கிராஜிடம் கேட்டபோது, இங்கு அனைத்து மருந்துகளும் தட்டுப்பாடின்றி விநியோகிக்கப்படுகின்றன. சில உயா் சிகிச்சைக்கான மாத்திரைகள் இருப்பு குறைந்தாலும், உடனடியாக வரவழைக்கப்பட்டு நோயாளிகளுக்கு வழங்கப்படுகிறது என்றாா்.