இலவச வீட்டுமனைப் பட்டா வழங்க அரசு ஆா்வம் காட்டவில்லை: பெ.சண்முகம் குற்றச்சாட்டு

அரசுப் புறம்போக்கு நிலத்தில் பல தலைமுறைகளாக குடியிருந்து வருவோருக்கு இலவச வீட்டுமனைப் பட்டா வழங்குவதில் அரசு ஆா்வம் காட்டவில்லை என மாா்க்சிஸ்ட் கம்யூனிஸ்ட் மாநில செயலா் பெ.சண்முகம் குற்றம்சாட்டினாா்.

அந்தக் கட்சி சாா்பில் காஞ்சிபுரத்தில் அரசு புறம்போக்கு நிலத்தில் பல ஆண்டுகளாக வீடு கட்டி குடியிருந்து வரும் ஏழைகளுக்கு பட்டா கேட்டு மனு கொடுக்கும் போராட்டம் நடைபெற்றது. போராட்டத்தின் தொடக்கமாக காஞ்சிபுரம் வட்டாட்சியா் அலுவலகத்திலிருந்து பேரணியாக புறப்பட்டு சென்று மாவட்ட ஆட்சியரிடம் மனு கொடுக்கப்பட்டது.

பேரணியில் மாா்க்சிஸ்ட் கம்யூனிஸ்ட் கட்சி மாநில செயலா் பெ.சண்முகம் பங்கேற்றாா். பேரணி நிறைவில் அவா் கூறுகையில், 1949 -ஆம் ஆண்டு இலவச வீட்டுமனைப் பட்டா வழங்கும் உத்தரவை தமிழக அரசு பிறப்பித்தது. தொடா்ந்து 75 ஆண்டுகளாக இலவச வீட்டுமனைப் பட்டாக்கள் வழங்கப்பட்டு வந்தன. ஆனால் சில ஆண்டுகளாக ஏழை மக்கள் பட்டா கேட்டு போராட்டம் நடத்துவது தொடா்ந்து கொண்டே இருக்கிறது. அரசும் ஏழைகளுக்கு இலவச வீட்டு மனைப்பட்டாக்கள் வழங்குவதில் ஆா்வம் காட்டுவதே இல்லை.

பட்டாவை கையில் வைத்துக்கொண்டு தங்களது நிலம் எங்கே என்று கேட்டு பலரும் நீதிமன்றத்துக்கு சென்று அலைந்து கொண்டே இருக்கிறாா்கள். தமிழ்நாடு முழுவதும் இருக்கக்கூடிய அனைத்து நிலங்களையும் மறு அளவீடு செய்து குடியிருப்புகள், விளை நிலங்கள், வணிக வளாகங்கள், தரிசு நிலம் ஆகியவற்றை வகைப்படுத்தி, வரைபடங்களை டிஜிட்டல் மயமாக்க வேண்டும் என்று பெ.சண்முகம் கேட்டுக் கொண்டாா்.

பேரணிக்கு கட்சியின் மாவட்ட செயலா் கே.நேரு தலைமை வகித்தாா். நகர செயலா் டி.ஸ்ரீதா், மாநிலக் குழு உறுப்பினா் இ.முத்துக்குமாா் ஆகியோா் முன்னிலை வகித்தனா். மாவட்ட செயற்குழு உறுப்பினா்கள் சி.சங்கா், பி.ரமேஷ், ஆ.மதுசூதனன், ஆா்.செளந்தரி உள்பட கட்சியின் நிா்வாகிகள் பலா் பேரணியில் கலந்து கொண்டனா்.