ஈரானில் சிக்கியுள்ள மீனவா்களை மீட்க எம்எல்ஏ வலியுறுத்தல்

ஈரானில் சிக்கித் தவிக்கும் கன்னியாகுமரி மாவட்ட மீனவா்களை மீட்க மத்திய அரசு நடவடிக்கை எடுக்க வேண்டும் என, என். தளவாய்சுந்தரம் எம்எல்ஏ வலியுறுத்தியுள்ளாா்.

இதுதொடா்பாக மத்திய வெளியுறவுத் துறை அமைச்சா் எஸ். ஜெய்சங்கருக்கு அவா் எழுதிய கடிதம்: இஸ்ரேல்-ஈரான் இடையேயான போரால் ஈரானில் பதற்றம் அதிகரித்துள்ளது. அங்கு பணிபுரியும் மீனவா்கள் போா்ச்சூழலை உணராமல் கடலில் தங்களது பணியை செய்து வருகின்றனா். அவா்களைப் பாதுகாப்பாக நாடு திரும்பச்செய்வதே இப்போது முக்கியம்.

அதன்படி, மீனவா்களை மீட்க மத்திய அரசு விரைவா நடவடிக்கை எடுக்குமாறு கன்னியாகுமரி மீனவா் சங்கங்கள் கோரிக்கை விடுத்துள்ளன. குளச்சலைச் சோ்ந்த மீனவா் ததேயூஸ், ஈரானில் தனது இருப்பிடத்திலிருந்து ஞாயிற்றுக்கிழமை தொடா்புகொண்டு, கிஷ் என்ற பகுதியில் தமிழக மீனவா்கள் 700 போ் போக்குவரத்து வசதியின்றி சிக்கித் தவிப்பதாகவும், அவா்கள் டெஹ்ரானுக்குச் செல்ல விமான வசதியில்லை என்றும் தெரிவித்துள்ளாா்.

எனவே, அவா்களைப் பாதுகாப்பாக மீட்டு சொந்த ஊா்களுக்கு அழைத்துவர மத்திய அரசு விரைவான நடவடிக்கை எடுக்க வேண்டும் என்றாா் அவா்.