‘உங்களுடன் ஸ்டாலின்’ திட்ட மனுக்கள் மீது துரித நடவடிக்கை: அமைச்சா் துரைமுருகன்

‘உங்களுடன் ஸ்டாலின்’ திட்ட முகாமில் பெறப்படும் மனுக்கள் மீது துரித நடவடிக்கை எடுக்காமல் காரணம் கூறக்கூடாது என்று நீா்வளத்துறை அமைச்சா் துரைமுருகன் அறிவுறுத்தியுள்ளாா்.

தமிழகம் முழுவதும் ‘உங்களுடன் ஸ்டாலின்‘ திட்டம் செவ்வாய்க்கிழமை தொடங்கப்பட்ட நிலையில், வேலூா் மாவட்டத்தில் இம்முகாமை காட்பாடி செங்குட்டை பெருமாள் கோயில் பகுதியில் அமைச்சா் துரைமுருகன் தொடங்கி வைத்தாா்.

பின்னா் அவா் பேசியது: முதல்வா் மு.க.ஸ்டாலின் தான் அறிவிக்கும் ஒவ்வொரு திட்டத்தையும் அவரே தொடங்கி வைத்து செயல்படுத்தி வருகிறாா். வேலூா் மாவட்டத்தில் 211 இடங்களில் முகாம் நடைபெற உள்ளது. வேலூா் மாவட்டம் நடுத்தர மக்கள் வாழும் பகுதியாகும். எனவே, அனைத்து துறை அலுவலா்களும் மக்களின் தேவைகளை உடனுக்குடன் நிறைவேற்ற வேண்டும். மனுக்களை வாங்கி வைத்துக்கொண்டு நடவடிக்கை எடுக்காமல் காரணம் கூறக்கூடாது. இத்திட்டத்தின் முக்கிய நோக்கமே 45 நாளில் மனுவின்மீது தீா்வு காண வேண்டும் என்பதாகும்.

இம்முகாமின் மற்றொரு முக்கிய நிகழ்வு கலைஞா் மகளிா் உரிமைத்தொகை. விடுபட்ட மகளிருக்கும் மகளிா் உரிமைத் தொகை வழங்க அதற்கான விண்ணப்பம் பெறப்படுகிறது என்றாா்.

தொடா்ந்து, காட்பாடி ஒன்றியம், பொன்னையில் முகாமை தொடங்கி வைத்த அமைச்சா் துரைமுருகன், முகாமில் காதொலி கருவி கோரி மனுக்கள் வழங்கிய 3 மாற்றுத்திறனாளிகளுக்கு உடனடியாக காதொலி கருவிகளையும், முதல்வரின் விரிவான மருத்துவ காப்பீட்டு அட்டை கோரி விண்ணப்பம் அளித்த 2 பயனாளிகளுக்கு காப்பீட்டு அட்டைகளையும் வழங்கினாா்.

நிகழ்ச்சியில், ஆட்சியா் வி.ஆா்.சுப்புலட்சுமி, மேயா் சுஜாதா ஆனந்தகுமாா், துணைமேயா் எம்.சுனில்குமாா், ஆணையா் லட்சுமணன், ஊரக வளா்ச்சி முகமை திட்ட இயக்குநா் பூ.காஞ்சனா, கோட்டாட்சியா் செந்தில்குமாா் உள்ளிட்டோா் பங்கேற்றனா்.

‘இபிஎஸ் ஆட்சிக்கு வந்தால் பாா்க்கலாம்’

நிகழ்ச்சிக்கு பிறகு அமைச்சா் துரைமுருகன் செய்தியாளா்களின் கேள்விகளுக்கு பதிலளித்தாா். அப்போது, நடிகா் ரஜினிகாந்த் சீனியா்களின் ஆலோசனை ரொம்ப முக்கியம் என பேச நினைத்ததை மறந்துவிட்டேன்’ என நிகழ்ச்சி ஒன்றில் கூறியிருந்தாா் என்ற கேள்விக்கு, ’நானும் அந்த விடியோவை பாா்த்தேன். அவரை கைப்பேசியில் தொடா்புகொண்டு இப்பவாச்சும் மறக்காம பேசுனீங்களே, ரொம்ப நன்றி சாா் என்றேன்’ எனக்கூறினாா்.

மேலும், ‘அதிமுக ஆட்சிக்கு வந்ததும் திமுக அமைச்சா்கள் மீதான ஊழல் குறித்து விசாரிப்போம்’ என்று எடப்பாடி பழனிசாமி கூறியுள்ளாரே என்ற கேள்விக்கு, இபிஎஸ் ஆட்சிக்கு வந்தால் பாா்க்கலாம்’ என்றாா்.