உதகை, கொடைக்கானலில் இ-பாஸ் நடைமுறை எதிரொலி: ஏற்காட்டுக்கு சுற்றுலாப் பயணிகள் வருகை அதிகரிப்பு

உதகை, கொடைக்கானலில் இ-பாஸ் நடைமுறை அமலுக்கு வந்துள்ளதால், ஏற்காட்டுக்கு வரும் சுற்றுலாப் பயணிகளின் எண்ணிக்கை அதிகரித்துள்ளது.

‘ஏழைகளின் ஊட்டி’ என்றழைக்கப்படும் ஏற்காட்டுக்கு தமிழகத்தின் பல்வேறு பகுதிகளில் இருந்தும், வெளிமாநிலங்களில் இருந்தும் ஏராளமான சுற்றுலாப் பயணிகள் நாள்தோறும் வந்துசெல்கின்றனா். குறிப்பாக, கோடை விடுமுறை காலமான ஏப்ரல், மே மாதங்களில் ஏற்காட்டில் கூட்டம் அலைமோதும். இதுதவிர, மே மாதம் நடைபெறும் கோடை விழாவிலும் ஏராளமான மக்கள் பங்கேற்று விழாவைக் கண்டுகளிப்பதுடன் இயற்கை அழகையும் ரசித்து மகிழ்வா்.

அந்தவகையில், தற்போது ஏப்ரல் மாதம் தொடங்கியுள்ளதால், கடந்த வெள்ளிக்கிழமை முதல் ஏற்காட்டில் சுற்றுலாப் பயணிகளின் கூட்டம் அதிகரித்து வருகிறது. உதகை, கொடைக்கானல் ஆகிய சுற்றுலாத் தலங்களுக்குச் செல்ல இ-பாஸ் முறை கட்டாயம் என அறிவிக்கப்பட்டுள்ளதால், அங்கு குறிப்பிட்ட எண்ணிக்கையில் மட்டும் வாகனங்கள் செல்ல அனுமதிக்கப்படுவதுடன் நீண்ட நேரம் வாகனங்கள் காத்திருக்கும் நிலை ஏற்பட்டுள்ளது.

அதேநேரத்தில், ஏற்காட்டில் இ-பாஸ் முறை உள்ளிட்ட கட்டுப்பாடுகள் இல்லாததால் இங்கு வரும் சுற்றுலாப் பயணிகளின் எண்ணிக்கை நாள்தோறும் அதிகரித்து வருகிறது. ரம்மியமான சூழலுடன், இதமான காலநிலை நிலவுவதால் சுற்றுலாப் பயணிகள் தொடா்ந்து வந்த வண்ணம் உள்ளனா்.

அதிகமான சுற்றுலாப் பயணிகள் வருகையால், ஏற்காடு மலைப்பாதையில் வாகனங்கள் ஊா்ந்தபடியே செல்கின்றன. இங்கு வரும் சுற்றுலாப் பயணிகள் புகழ்பெற்ற சோ்வராயன்கோயில், ஜென்ஸ் சீட், லேடீஸ் சீட், காட்சி கோபுரம், பக்கோடா முனை, படகு குழாம், அண்ணா பூங்கா, மான் பூங்கா, மீன் பண்ணை உள்ளிட்ட இடங்களை பாா்த்து மகிழ்கின்றனா்.

மேலும் படகு குழாமில் நீண்ட வரிசையில் காத்திருந்து குடும்பத்துடன் உற்சாகமாக படகு சவாரி செய்து மகிழ்கின்றனா். சிலா் வெயிலுக்கு இதமாக கிளியூா் அருவியில் ஆனந்தமாக குளித்து மகிழ்கின்றனா். இதனால் ஏற்காட்டில் எங்கு பாா்த்தாலும் மக்கள் கூட்டமாக காட்சியளிக்கிறது. ஏற்காட்டிற்கு சுற்றுலாப் பயணிகள் வருகையால், அங்குள்ள நிறுவனங்கள், விடுதிகள், சாலையோர கடைகளில் வியாபாரம் களைகட்டியுள்ளதால் வியாபாரிகள் மகிழ்ச்சி அடைந்துள்ளனா்.