உயா் கல்வி, தொழில் வாய்ப்புகள் குறித்து வழிகாட்டும் ‘பாட்காஸ்ட்’ விடியோக்கள்: சென்னை ஐஐடி வெளியீடு

உயா் கல்வி வாய்ப்புகள், தொழில்கள் குறித்த சந்தேகங்களுக்கு விளக்கம் அளிக்கும் வகையில் ‘பாட்காஸ்ட்’ விடியோக்களை சென்னை ஐஐடி வெளியிட்டுள்ளது.

பிளஸ் 2 தோ்ச்சி பெற்ற மாணவா்கள், உயா் கல்வியில் எந்தப் படிப்பை தோ்வு செய்யலாம் என்பது குறித்த கல்வி ஆலோசனைகளை பாட்காஸ்ட் முறையில் சென்னை ஐஐடி பேராசிரியா்கள் விடியோக்கள் வெளியிட்டுள்ளனா். உயா் கல்வி வாய்ப்புகள் குறித்து அறிந்து கொள்வதற்கு மாணவா்களுக்கும் பெற்றோா்களுக்கும் இந்த விடியோக்கள் மிகவும் உதவிகரமாக இருக்கும் என சென்னை ஐஐடி இயக்குநா் வி.காமகோடி நம்பிக்கை தெரிவித்துள்ளாா்.

இது குறித்து அவா் செய்தியாளா்களிடம் கூறியதாவது:

சென்னை ஐஐடியின் பேராசிரியா் மகேஷ் பஞ்சக்நுலா, அறிவியல் மற்றும் தொழில்நுட்ப மாணவா்களுக்கான தொழில் வாய்ப்புகளை மையமாகக் கொண்ட பாட்காஸ்ட் தொடா் ஒன்றை தொடங்கியுள்ளாா். இதில், வாரந்தோறும் புதிய அத்தியாயம் ஒலி-ஒளிபரப்பப்படும். ‘எதிா்காலம் எளிமைப்படுத்தப்பட்டது’ என்ற தலைப்பில் வெளிவரும் இந்த பாட்காஸ்ட், பல்வேறு துறைகளில் தற்போதுள்ள தொழில் வாய்ப்புகள் குறித்து மாணவா்களுக்கும் பெற்றோா்களுக்கும் விளக்கம் அளிக்கும் வகையில் உருவாக்கப்பட்டுள்ளது.

இதன்மூலம் அறிவியல், பொறியியல், தொழில்நுட்பம் சாா்ந்த துறைகளைத் தோ்வு செய்வது குறித்த ஆலோசனைகள் வழங்கப்படுகின்றன. பேராசிரியா் மகேஷ் பஞ்சக்நுலாவின் பாட்காஸ்ட்களை, ஸ்போட்டிஃபை, யூடியூப், ஆப்பிள் பாட்காஸ்ட் உள்பட அனைத்து முக்கியத் தளங்களிலும் பாா்க்கலாம். நவீன ‘ஸ்டெம்’ படிப்புகள் குறித்த ஆலோசனைகளும் வழங்கப்பட்டுள்ளன. இது குறித்து மாணவா்கள், பெற்றோா்கள், கல்வியாளா்கள் அறிந்து கொள்வதற்கு உதவிகரமாக இருக்கும்.

தமிழகத்தில் பிளஸ் 2 தோ்வு முடிவுகள் தற்போது வெளியாகி உள்ளன. இந்நிலையில், பாட்காஸ்ட் மூலம் விவசாயம் முதல் என்ஜினியரிங் வரையிலான உயா்கல்வி வாய்ப்புகள், தொழில்நுட்பப் படிப்புகள் உள்ளிட்ட பல்வேறு படிப்புகளுக்கான மாணவா்களுக்கு எழும் சந்தேகங்களை கேள்விகளாக உருவாக்கி, அதற்கு நிபுணா்களின் விளக்கத்தைக் கேட்டு வெளியிடவுள்ளோம். மேலும், கலந்து கொள்வோா்களின் அனுபவங்களையும் கேட்டு வெளியிட திட்டமிட்டுள்ளோம். இந்த பாட்காஸ்ட் நோ்காணல்கள் தமிழ், ஆங்கிலம், தெலுங்கு, ஹிந்தி ஆகிய மொழிகளிலும் வெளியிடப்படும் என்றாா் அவா்.