உலகளாவிய பாலின இடைவெளி குறியீடு: 131-ஆவது இடத்துக்கு சரிந்த இந்தியா

உலகப் பொருளாதார அமைப்பு வெளியிட்ட 2025-ஆம் ஆண்டுக்கான 148 நாடுகளை உள்ளடக்கிய உலகளாவிய பாலின இடைவெளி குறியீடு தரவரிசைப் பட்டியலில் இந்தியா 131-ஆவது இடத்துக்கு தள்ளப்பட்டிருப்பது தெரியவந்துள்ளது.

கடந்த ஆண்டு 146 நாடுகளை உள்ளடக்கிய இந்தத் தரவரிசைப் பட்டியலில் 129-ஆவது இடத்தில் இருந்த இந்தியா, நிகழாண்டு பின்தங்கியுள்ளது.

இரு பாலினத்தவருக்கான பொருளாதார பங்கேற்பு மற்றும் வாய்ப்பு, கல்வி வாய்ப்பு, சுகாதாரம் மற்றும் உயிா் வாழ்வு, அரசியல் அதிகாரமளித்தல் உள்ளிட்ட 4 காரணிகளின் அடிப்படையில் இந்தத் தரவரிசைப் பட்டியல் வெளியிடப்படுகிறது. இந்தப் பாலின இடைவெளியைக் குறிக்கும் நடவடிக்கையில் இந்தியா தொடா்ந்து பின்தங்கியுள்ளது.

இதுகுறித்து உலகப் பொருளாதார அமைப்பின் அறிக்கையில் கூறியிருப்பதாவது:

2025-ஆம் ஆண்டுக்கான தரவரிசைப் பட்டியலில் ஒட்டுமொத்த பாலின சமத்துவ மதிப்பெண் 64.4 சதவீதத்துடன் இந்தியா 131-ஆவது இடத்தில் உள்ளது. கடந்த ஆண்டுடன் ஒப்பிடும்போது, மற்ற நாடுகளின் பாலின சமத்துவத்தை ஏற்படுத்தும் தீவிர முயற்சிகள் காரணமாக இந்தியா குறிப்பிடத்தக்க அளவில் பின்தங்கியுள்ளது.

இந்திய பொருளாதாரத்தின் ஒட்டுமொத்த செயல்திறன் 0.3 புள்ளிகள் அளவுக்கு மேம்பட்டுள்ளது. மேலும், தரவரிசைக்கான 4 காரணிகளில் பொருளாதார பங்கேற்பு மற்றும் வாய்ப்பு பிரிவில் மட்டும் 40.7 சதவீதம் அளவுக்கு பாலின சமத்துவத்தை இந்தியா மேம்படுத்தியுள்ளது. ஆனால், மற்ற காரணிகளின் மதிப்பெண் கடந்த ஆண்டைப் போலவே 28.6 சதவீதம் முதல் 29.9 சதவீதம் என்ற நிலையிலேயே தொடா்கிறது.

குறிப்பாக, தொழிலாளா் பங்கேற்பு விகிதம் கடந்த ஆண்டின் 45.9 சதவீதம் என்ற மதிப்பெண் நிலையில் தொடா்கிறது. கல்வி வாய்ப்பு பிரிவில் 97.1 சதவீத மதிப்பெண்ணை இந்தியா பெற்றுள்ளது. இதில் பெண்களின் பங்கு குறிப்பிடத்தக்க அளவில் உயா்ந்துள்ளது.

அதே நேரம், அரசியல் அதிகாரமளித்தல், நாடாளுமன்றத்தில் பெண்களின் பிரதிநிதித்துவம் உள்ளிட்ட காரணிகளில் கடந்த ஆண்டைவிட சற்று மதிப்பெண் குறைந்துள்ளது. அதுபோல, அமைச்சரவையில் பெண்களின் பிரதிநிதித்துவத்துக்கான பிரிவிலும் மதிப்பெண் கடந்த ஆண்டின் 6.5 சதவீதத்திலிருந்து 5.6 சதவீதமாக சரிந்துள்ளது. 2019-இல் இந்தப் பிரிவில் இந்தியாவின் மதிப்பெண் 30 சதவீதமாக இருந்தது என்று தெரிவிக்கப்பட்டுள்ளது.

அரசியல் அதிகாரமளித்தல் மற்றும் பொருளாதார பங்கேற்பில் பாலின சமத்துவத்தை ஊக்குவிப்பதில் தெற்காசியாவிலேயே சிறந்த நாடாக வங்கதேசம் உருவெடுத்துள்ளது. இதன்மூலம், கடந்த ஆண்டு தரவரிசையில் 75-ஆவது இடத்திலிருந்து இந்த நாடு தற்போது 24-ஆவது இடத்துக்கு முன்னேறியுள்ளது. நேபாளம் 125-ஆவது இடத்திலும், இலங்கை 130-ஆவது இடத்திலும், பூடான் 119-ஆவது இடத்திலும், மாலத்தீவுகள் 138-ஆவது இடத்திலும் உள்ளன.

தரவரிசைப் பட்டியலில் கடைசி நாடாக பாகிஸ்தான் 148-ஆவது இடத்தைப் பிடித்துள்ளது.