ஊராட்சி பகுதிகளில் சொத்துவரி உயா்வை திரும்பப் பெற வேண்டும்: எடப்பாடி பழனிசாமி

ஊராட்சிப் பகுதிகளில் உயா்த்தப்பட்ட சொத்துவரி மற்றும் தண்ணீா் கட்டணத்தை தமிழக அரசு உடனடியாக திரும்பப் பெற வேண்டும் என்று அதிமுக பொதுச்செயலரும், எதிா்க்கட்சித் தலைவருமான எடப்பாடி கே.பழனிசாமி தெரிவித்துள்ளாா்.

இது குறித்து அவா் வெளியிட்ட அறிக்கை:

2024-2025 முதல் ஊராட்சி பகுதிகளில் புதிதாக வீடு கட்டியவா்கள் மற்றும் வீடு கட்ட திட்டமிட்டுள்ளவா்கள், வீட்டின் கட்டுமானப் பரப்பை அளந்து வரி நிா்ணயம் செய்ய இணையதளம் மூலம் விண்ணப்பிக்க வேண்டும். இந்தப் புதிய சட்டத்தின்படி, ஒரு சதுர அடிக்கு கட்டட வரைபடக் கட்டணமாக சுமாா் ரூ. 37 செலுத்த வேண்டும்.

மேலும், 2024-2025 வரை ஓலைக் குடிசைக்கு ரூ. 44, ஓடு மற்றும் ஆஸ்பெஸ்டாஸ் ஷீட் வீட்டுக்கு ரூ. 66, கான்கிரீட் வீட்டுக்கு ரூ. 121 சொத்து வரியாக செலுத்தி வந்தனா்.

இந்நிலையில், தற்போது உயா்த்தப்பட்ட சொத்து வரியின்படி, 2025-2026 முதல் இனி ஓலைக் குடிசைகளுக்கு அதிகபட்சமாக சதுர அடிக்கு 40 பைசா முதல் ரூ. 1 வரையும், ஓட்டு வீட்டுக்கு சதுர அடிக்கு 30 பைசா முதல் 60 பைசா வரையும், கான்கிரீட் வீட்டுக்கு சதுர அடிக்கு 50 பைசா முதல் ரூ. 1 வரையும் சொத்து வரி உயா்த்தப்பட வேண்டும் என்றும், ஏற்கெனவே உள்ள பழைய வீடுகளுக்கும் இந்த வரி உயா்வின்படி புதிய வரியை வசூலிக்க வேண்டும் என்றும் அரசு உள்ளாட்சிகளுக்கு உத்தரவு வழங்கியுள்ளது.

இதன்படி, இனி ஊராட்சிகளில் அதிகபட்சமாக 500 சதுர அடி கான்கிரீட் வீடுகளுக்கு ரூ. 500, ஓட்டு வீடுகளுக்கு ரூ. 300, ஓலை வீடுகளுக்கு ரூ. 200 என வீட்டுவரி வசூலிக்கப்படும். ஏழை மக்களின் குடிசைகளுக்கு வரியை உயா்த்தி, அவா்களை வேதனையில் ஆழ்த்தி உள்ளதுதான் திமுக ஆட்சியின் சாதனை.

ஊராட்சி பகுதிகளுக்கு சொத்து வரி மற்றும் தண்ணீா் கட்டணம் தமிழக அரசு உயா்த்தியிருப்பது கண்டிக்கத்தக்கது. எனவே, ஊராட்சி பகுதிகளுக்கு உயா்த்தப்பட்ட சொத்து வரிகளை அரசு உடனடியாக திரும்பப் பெற வேண்டும் என எடப்பாடி பழனிசாமி தெரிவித்துள்ளாா்.