ஒகேனக்கல்லுக்கு நீா்வரத்து 9,500 கனஅடி

ஒகேனக்கல் காவிரி ஆற்றில் நீா்வரத்து விநாடிக்கு 9,500 கனஅடியாக சரிந்துள்ளது.

தமிழக காவிரி நீா்ப்பிடிப்புப் பகுதிகளில் பெய்துவந்த மழை குறைந்ததால், காவிரி ஆற்றில் நீா்வரத்து சரிந்து வருகிறது. செவ்வாய்க்கிழமை மாலை நிலவரப்படி 16,000 கனஅடியாகவும், புதன்கிழமை காலை 12,000 கனஅடியாகவும் இருந்த நீா்வரத்து, மாலை 9,500 கனஅடியாக சரிந்து தமிழக - கா்நாடக எல்லையான பிலிகுண்டுலு வழியாக ஒகேனக்கல்லுக்கு வந்து கொண்டிருக்கிறது.

நீா்வரத்து சரிவால் ஒகேனக்கல்லில் உள்ள பிரதான அருவி, சினி அருவி, ஐந்தருவி உள்ளிட்ட அருவிகளில் நீா் குறைந்து பாறைத்திட்டுகள் வெளியே தெரிகின்றன. ஒகேனக்கல்லுக்கு வரும் நீா்வரத்தின் அளவுகளை மத்திய நீா்வளத் துறை அதிகாரிகள் கண்காணித்து வருகின்றனா்.