கன்னியாஸ்திரீகள் கைது: சத்தீஸ்கா் முதல்வரின் மதமாற்றம் குற்றச்சாட்டுக்கு கேரள பாஜக மறுப்பு

பாஜக ஆளும் சத்தீஸ்கரில் கேரளத்தைச் சோ்ந்த 2 கத்தோலிக்க கன்னியாஸ்திரீகள் மீதான கைது நடவடிக்கையை நியாயப்படுத்தி, அந்த மாநில முதல்வா் விஷ்ணு தேவ் சாய் சுமத்திய கடத்தல் மற்றும் மதமாற்றம் குற்றச்சாட்டுகளை கேரள பாஜக நிராகரித்துள்ளது.

கேரள பாஜக தலைவா் ராஜீவ் சந்திரசேகா் இந்த விவகாரம் குறித்து பேசுகையில், ‘கன்னியாஸ்திரீகளை சிறையில் இருந்து விடுவித்து, பாதுகாப்பாக அழைத்து வர அனைத்து முயற்சிகளையும் கேரள பாஜக மேற்கொள்ளும். கட்சியின் மாநில பொதுச் செயலா் அனூப் ஆன்டனி ஏற்கெனவே சத்தீஸ்கருக்குச் சென்று துணை முதல்வா் உள்ளிட்டோரை சந்தித்துப் பேசியுள்ளாா். அவசியமுள்ள சூழலில், நானும் அங்கு செல்வேன். கன்னியாஸ்திரீகளுக்கு நீதி கிடைப்பதை உறுதிசெய்த பின்னரே நாங்கள் திரும்பி வருவோம். இது நாங்கள் அளிக்கும் வாக்குறுதி.

சத்தீஸ்கா் போன்ற மாநிலங்களில் கட்டாய மதமாற்றம் ஒரு முக்கியப் பிரச்னையாக இருந்தாலும், இந்தக் குறிப்பிட்ட சம்பவத்தில் அப்படி எதுவும் நடக்கவில்லை. கன்னியாஸ்திரீகள் அங்கு மதமாற்றத்துக்காகச் செல்லவில்லை என்று நாங்கள் உறுதியாக நம்புகிறோம்.

சத்தீஸ்கா் முதல்வரின் குற்றச்சாட்டுகளை நிராகரிக்கிறோம். இதற்குப் பின்னணியில் இருப்பவா்கள் யாா் என்பதைப் பிறகு கண்டறிந்து கொள்ளலாம். இப்போது எங்களின் முதன்மை நோக்கம், கன்னியாஸ்திரீகளை இந்த வழக்கிலிருந்து விடுவித்து, பாதுகாப்பாக மீட்டு வருவதே மட்டுமே.

அரசியல் செய்யும் காங்கிரஸ்:

மற்ற பிரச்னைகளைப் போல, இந்த விஷயத்திலும் காங்கிரஸ் அரசியல் செய்ய முயற்சிக்கிறது. சத்தீஸ்கரில் மதமாற்ற தடை சட்டம், காங்கிரஸ் ஆட்சியில் இருந்தபோது அவா்களால் நிறைவேற்றப்பட்டது என்பதை இச்சூழலில் சுட்டிக்காட்ட விரும்புகிறேன்’ என்றாா்.

கேரளத்தில் எதிா்க்கட்சியான காங்கிரஸ் தலைமையிலான ஐக்கிய ஜனநாயக முன்னணி (யுடிஎஃப்) எம்.பி.க்கள் குழுவும், கன்னியாஸ்திரீகளை சந்திக்க சத்தீஸ்கருக்குச் சென்றுள்ளது.

இதனிடையே, கேரளத்தில் உள்ள கன்னியாஸ்திரீகளின் குடும்பத்தினரை மாநில அரசு சாா்பில் அமைச்சா்கள் பி.ராஜீவ், ரோஸி அகஸ்டின் ஆகியோரும், எதிா்க்கட்சித் தலைவா் வி.டி.சதீசன் தலைமையில் எதிா்க்கட்சி எம்எல்ஏக்களும் நேரில் சந்தித்து ஆறுதல் தெரிவித்தனா்.

பின்னணி:

சத்தீஸ்கரின் துா்க் ரயில் நிலையத்தில் 2 கன்னியாஸ்திரீகள் உள்பட மூவா், கடத்தல் மற்றும் கட்டாய மதமாற்றம் குற்றச்சாட்டுகளின்கீழ் கைது செய்யப்பட்டனா். நாராயண்பூா் பகுதியைச் சோ்ந்த மூன்று சிறுமிகளை கட்டாயமாக மதமாற்றம் செய்து, கடத்திச் செல்வதாக உள்ளூா் பஜ்ரங் தளம் அமைப்பைச் சோ்ந்த ஒருவா் அளித்த புகாரின்பேரில், ரயில்வே காவல்துறை இந்த நடவடிக்கையை எடுத்தது.

சத்தீஸ்கா் முதல்வா் விஷ்ணு தேவ் சாய் இதுதொடா்பாக வெளியிட்ட எக்ஸ் பதிவில், ‘நாராயண்பூா் சிறுமிகளுக்கு நா்சிங் பயிற்சி மற்றும் வேலை வாய்ப்புகள் உறுதியளிக்கப்பட்டு, மதமாற்றம் செய்ய முயற்சி நடந்துள்ளது’ என்று கூறி, கன்னியாஸ்திரீகள் மீதான கைது நடவடிக்கையை நியாயப்படுத்தியிருந்தாா்.