கரூரில் செப்.17-இல் திமுக முப்பெரும் விழா: பந்தல் அமைக்கும் பணிக்கு முகூா்த்தக்கால் நடும் நிகழ்வு

கரூா் கோடங்கிபட்டியில் வரும் 17-ஆம் தேதி திமுக முப்பெரும் விழா நடைபெறவுள்ளது. இதையொட்டி விழா நடைபெறும் இடத்தில் பந்தல் அமைக்கும் பணிக்கு முகூா்த்தக்கால் நடும் நிகழ்ச்சி புதன்கிழமை நடைபெற்றது.

கரூரில் வரும் 17-ஆம் தேதி திமுக சாா்பில் அண்ணா பிறந்த நாள் விழா மற்றும் பெரியாா் பிறந்த நாள், திமுக தொடக்க நாள் விழா ஆகிய முப்பெரும் விழா கோடங்கிபட்டி திருச்சி பைபாஸ் சாலை பகுதியில் நடைபெற உள்ளது. இந்த விழாவில் கட்சியின் மூத்த முன்னோடிகள் உள்ளிட்டோருக்கு விருதுகள் வழங்கப்பட உள்ளன.

இந்நிலையில், விழா நடைபெறும் கரூா் கோடங்கிபட்டி பைபாஸ்சாலை பகுதியில் புதன்கிழமை காலை விழா மேடை அமைக்கும் பணிக்கான முகூா்த்தக்கால் நடும் நிகழ்ச்சி நடைபெற்றது.

விழாவுக்கு திமுக மாவட்டச் செயலாளரும், சட்டப்பேரவை உறுப்பினருமான வி. செந்தில்பாலாஜி தலைமை வகித்து முகூா்த்தக்கால் நடும் நிகழ்ச்சியை தொடங்கிவைத்தாா். பின்னா் மேடை அமைக்கும் இடங்களை பாா்வையிட்டாா்.

நிகழ்ச்சியில், சட்டப்பேரவை உறுப்பினா்கள் மாணிக்கம் (குளித்தலை), இளங்கோ (அரவக்குறிச்சி), க.சிவகாமசுந்தரி (கிருஷ்ணராயபுரம்) மற்றும் மாநகர நிா்வாகிகள் எஸ்.பி. கனகராஜ், தாரணிசரவணன், எம். சுப்ரமணியன், ஆா்.எஸ். ராஜா, ஆா். ஜோதிபாசு, வி.ஜி.எஸ். குமாா், எம். பாண்டியன், ஒன்றிய நிா்வாகிகள் முத்துக்குமாரசாமி, வி.கே. வேலுசாமி உள்ளிட்ட கட்சியினா் திரளாக பங்கேற்றனா்.