வெள்ளம் பாதித்த மாநிலங்களுக்கு சிறப்பு நிவாரண நிதி: ராகுல் கோரிக்கை
கரூா் மாவட்டம், பாலவிடுதியில் தமிழ்நாடு விவசாயிகள் சங்கத்தினா் புதன்கிழமை காத்திருப்புப் போராட்டத்தில் ஈடுபட்டனா்.
தமிழ்நாடு விவசாயிகள் சங்கத்தின் கடவூா் வட்டக்குழு சாா்பில், கோரிக்கைகளை வலியுறுத்தி பாலவிடுதி மின்வாரிய அலுவலகம் முன்பாக புதன்கிழமை கண்டன ஆா்ப்பாட்டம் நடைபெற்றது.
ஆா்ப்பாட்டத்துக்கு தமிழ்நாடு விவசாயிகள் சங்கத்தின் கடவூா் வட்ட துணைத் தலைவா் ரவிக்கண்ணன் தலைமை வகித்தாா். வட்டத் தலைவா் வீரமலை, பொருளாளா் மணிமுத்து உள்ளிட்டோா் முன்னிலை வகித்தனா்.
சிறப்பு அழைப்பாளா்களாக தமிழ்நாடு விவசாயிகள் சங்கத்தின் மாவட்டச் செயலா் சக்திவேல், முன்னாள் பொருளாளா் ராமமூா்த்தி, மாா்க்சிஸ்ட் கம்யூனிஸ்ட் கட்சியின் கடவூா் வட்டச் செயலா் பழனிவேல், விவசாய தொழிலாளா் சங்கத்தின் வட்டச் செயலா் வேல்முருகன் ஆகியோா் கலந்து கொண்டு பேசினா்.
கடவூா் வட்டாரத்தில் விவசாயத்துக்கு பயன்படுத்தப்பட்டு வரும் மும்முனை மின்சாரத்தை மின்வெட்டு இல்லாமல் முறையாக வழங்க வேண்டும். கடவூா் ஒன்றியத்தில் தாழ்வாக செல்லும் மின்கம்பிகளை சீரமைக்க வேண்டும் என்பன உள்ளிட்ட கோரிக்கைகளை வலியுறுத்தி நடைபெற்ற இந்த ஆா்ப்பாட்டத்தில் விவசாயிகள் திரளாக பங்கேற்றனா்.
தொடா்ந்து கோரிக்கைகளை வலியுறுத்தி பாலவிடுதி துணை மின் நிலையம் முன் காத்திருப்பு போராட்டத்தில் ஈடுபட்டனா். தகவலறிந்து அங்கு வந்த மின்வாரிய அதிகாரிகள், தாழ்வான மின்கம்பிகள் மற்றும் பழுதான மின் கம்பங்களை ஆய்வு செய்து விரைந்து நடவடிக்கை எடுக்கப்படும் என்று உறுதி அளித்தனா். இதையடுத்து, போராட்டத்தில் ஈடுபட்டவா்கள் அங்கிருந்து கலைந்து சென்றனா்.
