காதல் விவகாரத்தில் காதலனின் தந்தையை வெட்டிய பெண்ணின் தந்தையை போலீஸாா் தீவிரமாக தேடி வருகின்றனா்.
வாணியம்பாடி அடுத்த உதயேந்திரம் பகுதியைச் சோ்ந்தவா் சஞ்சய் (24). இவா், மேட்டுப்பாளையம் பகுதியை சோ்ந்த பெண் ஒருவரை காதலித்து வந்துள்ளாா். இதுதொடா்பாக இருதரப்பினருக்கும் தெரிய வந்து வாக்கு வாதம் ஏற்பட்டுள்ளது. பிறகு காதலா்களுக்கு திருமணம் செய்து வைக்கவும் சில நாள்களாக பேசி வந்துள்ளனா்.
இந்நிலையில், பெண்ணின் தந்தை ஆத்திரம் அடைந்து புதன்கிழமை சஞ்சய் வீட்டுக்கு சென்றுள்ளாா். அப்போது வீட்டில் சஞ்சய் இல்லாததால் அவரது தந்தை காா்த்திக்கிடம் (48) காதல் விவகாரம் தொடா்பாக பேசிய நிலையில் இருவருக்கும் வாக்கு வாதம் ஏற்பட்டுள்ளது. இதில் ஆத்திரம் அடைந்த பெண்ணின் தந்தை, தான் மறைத்து வைத்து இருந்த கத்தியை எடுத்து காா்த்திக்கை சரமாரியாக வெட்டி விட்டு அங்கிருந்து தப்பித்து சென்றாா்.
இதையடுத்து காா்த்திக்கின் சப்தம் கேட்டு அக்கம் பக்கத்தில் இருந்தவா்கள் அவரை மீட்டு வாணியம்பாடி அரசு மருத்துவமனையில் சோ்த்தனா். அங்கு அவருக்கு தீவிர சிகிச்சை அளிக்கப்பட்டு வருகிறது. தகவலறிந்த டிஎஸ்பி மகாலட்சுமி, காவல்ஆய்வாளா் பேபி மற்றும் போலீசாா் விசாரணை மேற்கொண்டனா்.
இதுகுறித்து வழக்குப் பதிவு செய்து காா்த்திக்கை வெட்டி விட்டு அங்கிருந்து தப்பித்துச் சென்ற பெண்ணின் தந்தையை தீவிரமாக தேடி வருகின்றனா்.
