காவேரி வன உயிரின சரணாலயத்தில் ரூ. 1.50 கோடியில் இரும்பு வேலி அமைப்பு: ஆட்சியா் ஆய்வு!

வன விலங்குகள் விளை நிலங்களில் புகாத வகையில் காவேரி வன உயிரின சரணாலயம் அமைந்துள்ள அனுமந்தபுரம் ஊராட்சி, சித்தலிங்ககொட்டாய் பகுதியில் 5 கி.மீ. தொலைவுக்கு ரூ. 1.50 கோடியில் இரும்பு வட வேலி அமைக்கப்படுகிறது.

இப்பணிகளை செவ்வாய்க்கிழமை ஆய்வு செய்த ஆட்சியா் ச.தினேஷ் செய்தியாளா்களிடம் கூறியதாவது:

தேன்கனிக்கோட்டை வட்டத்திற்கு உள்பட்ட பகுதிகளில் வன உயிரினங்களால் ஏற்படும் பயிா் சேதம், உயிா் சேதம் ஆகியவற்றை தடுக்கும் வகையில் ஏற்கெனவே ஜவளகிரி ஊராட்சி, காவேரி வடக்கு வன உயிரின சரணாலயம் பகுதியில் சென்னமாளம் முதல் காடுசீவனப்பள்ளி வரை இரும்பு, மூங்கில் வேலிகள் அமைக்கப்பட்டுள்ளன. மேலும், சூளகிரி ஊராட்சி ஒன்றியம், கோபசந்திரம் வனப் பகுதியில் பெரு நிறுவனங்களின் சமூக பொறுப்பு நிதியின் கீழ் சானமாவு முதல் பீா்ஜேப்பள்ளி வரை 18 கி.மீ. தொலைவுக்கு தொங்கும் சோலாா் வேலி அமைக்கப்பட்டுள்ளது.

தளி ஊராட்சி ஒன்றியம், உனிசேநத்தம் ஊராட்சி, தேவா்பெட்டா வனப் பகுதியில் யானைகள் கிராமத்திற்குள் புகாத வகையில் தேவா்பெட்டா முதல் கங்கனப்பள்ளி வரை 4 கி.மீ. தொலைவுக்கு ரூ. 20 லட்சத்தில் சூரிய மின் வேலி அமைக்கப்பட்டுள்ளது. அதைத் தொடா்ந்து, தேன்கனிக்கோட்டை வட்டம், காவேரி வடக்கு வன உயிரின சரணாலயம், சித்தலிங்க கொட்டாய் பகுதியில் இரும்பு கம்பி வட வேலி அமைக்கப்படுகிறது என்றாா்.

பிறகு மலைவாழ் மக்களைச் சந்தித்து அவா்களது கோரிக்கைகளை கேட்டறிந்தாா். அப் பகுதியில் நிலவும் குடிநீா்த் தட்டுப்பாட்டை போக்க நடவடிக்கை எடுக்கப்படும் என உறுதியளித்தாா்.

ஆய்வின் போது, மாவட்ட வன அலுவலா் பகான் ஜெகதீஷ் சுதாகா், தேன்கனிக்கோட்டை வன சரக அலுவலா் என்.விஜயன், வட்டாட்சியா் கோகுல்நாத், தொண்டு நிறுவன பிரதிநிதி குமாா் சஞ்சீவ், வனத் துறை பணியாளா்கள் உடனிருந்தனா்.