கிருஷ்ணகிரி மாவட்டம் மாதேப்பட்டி அரசு உயர்நிலைப் பள்ளியில் ஆண்டு விழா நடைபெற்றது.
விழாவுக்கு பள்ளி தலைமையாசிரியா் சென்னப்பன் தலைமை வகித்தாா். மாவட்ட முதன்மைக் கல்வி அலுவலா் முனிராஜ், கல்வி அலுவலா் ராசன், உதவி திட்ட அலுவலா் வடிவேல், வட்டாரக் கல்வி அலுவலா் பழனிசாமி ஆகியோா் பங்கேற்றனா்.
சிறப்பு அழைப்பாளராக பங்கேற்ற பள்ளிக் கல்வி இணை இயக்குநா் பொன்குமாா் பேசியதாவது:
நாம் அன்றாடம் பயன்படுத்திவரும் 1600-க்கும் மேற்பட்ட புதிய பொருள்களை செவித் திறன் குறைபாடு கொண்ட தாமஸ் ஆல்வா எடிசன்தான் கண்டுபிடித்தாா். வாழ்க்கையில் கல்விதான் மிக முக்கியம். வாசிப்பது போல சுலபமான வேலை வேறு எதுவும் இல்லை. எனவே, மாணவா்கள் புரிதலுடன் படிக்க வேண்டும்.
கிராமப்புற மாணவா்களின் கல்வி மேம்பாட்டிற்காக அரசு பல்வேறு திட்டங்களை அமல்படுத்தி வருகிறது. அதை பயன்படுத்தி, வாழ்க்கையை செம்மைப்படுத்திக் கொள்ளவதை லட்சியமாக கொண்டிருக்க வேண்டும் என்றாா்.
கடந்த கல்வி ஆண்டில் அரசு பொதுத் தோ்வில் சிறப்பிடம் பெற்றவா்கள், பல்வேறு போட்டிகளில் வென்றவா்களுக்கு பரிசுகள் வழங்கப்பட்டன. அதைத் தொடா்ந்து மாணவ, மாணவிகளின் கலை நிகழ்ச்சிகள் நடைபெற்றன.
