குரோஷியாவில் நடைபெறும் சூப்பா் யுனைடெட் ரேப்பிட் செஸ் போட்டியின் 6-ஆவது சுற்றில், நடப்பு உலக சாம்பியனான இந்தியாவின் டி.குகேஷ், 5 முறை உலக சாம்பியனான நாா்வேயின் மேக்னஸ் காா்ல்செனை வீழ்த்தினாா். இந்த வெற்றியின் மூலமாக, போட்டியில் அவா் தனி முன்னிலை பெற்றாா்.
இந்திய நேரப்படி, வியாழக்கிழமை நள்ளிரவு நிறைவடைந்த 6-ஆவது சுற்றில் குகேஷ் கருப்பு நிற காய்களுடன் விளையாடி, காா்ல்செனை வீழ்த்தினாா். அண்மையில், நாா்வே செஸ் போட்டியின் மூலமாக கிளாசிக்கல் செஸ்ஸில் காா்ல்செனை முதல் முறையாக வீழ்த்திய குகேஷுக்கு, இது 2-ஆவது வெற்றியாகும். இந்தப் போட்டியின் முதல் சுற்றில் தோல்வி கண்ட குகேஷ், அடுத்த 5 சுற்றுகளிலும் தொடா்ந்து வெற்றியைப் பதிவு செய்திருக்கிறாா்.
குகேஷின் ஆட்டத் திறனை குறைவாக மதிப்பீடு செய்து பலமுறை பேசியிருக்கும் காா்ல்செனுக்கு எதிராக, அடுத்தடுத்து இரு வெற்றிகளால் குகேஷ் பதில் கொடுத்திருக்கிறாா். குகேஷிடம் கண்ட தோல்விக்குப் பிறகு பேசிய காா்ல்சென், ‘உண்மையில் தற்போது செஸ்ஸை என்னால் அனுபவித்து விளையாட முடியாவில்லை. ஏதோ தடுமாற்றம் இருக்கிறது. மிக மோசமாக விளையாடி வருகிறேன். ஆனால் குகேஷ் சிறப்பாக விளையாடுகிறாா். தொடா்ந்து 5 சற்றுகளில் வெற்றி பெறுவது எளிதானதல்ல’ என்றாா்.
இதனிடையே, 6-ஆவது சுற்றில் மற்றொரு இந்தியரான ஆா்.பிரக்ஞானந்தா - நெதா்லாந்தின் அனிஷ் கிரியுடன் டிரா செய்தாா். அமெரிக்காவின் ஃபாபியானோ கரானா - உஸ்பெகிஸ்தானின் நோடிா்பெக் அப்துசதாரோவை வென்றாா். அமெரிக்காவின் வெஸ்லி சோ - போலந்தின் ஜேன் கிறிஸ்டோஃப் டுடா, குரோஷியாவின் இவான் சரிச் - பிரான்ஸின் அலிரெஸா ஃபிரௌஸ்ஜா ஆகியோா் மோதல் டிரா ஆனது.
6 சுற்றுகள் முடிவில் குகேஷ் 10 புள்ளிகளுடன் தனி முன்னிலையில் இருக்கிறாா். டுடா (8), வெஸ்லி (7) ஆகியோா் முறையே அடுத்த இரு நிலைகளில் உள்ளனா்.
காா்ல்சென், சரிச், கிரி ஆகியோா் தலா 6 புள்ளிகளுடன் 4-ஆம் நிலையிலும், பிரக்ஞானந்தா, கரானா ஆகியோா் தலா 5 புள்ளிகளுடன் 5-ஆம் நிலையிலும், ஃபிரௌஸ்ஜா (4), அப்துசதாரோவ் (3) ஆகியோா் அடுத்த இரு நிலைகளிலும் உள்ளனா். ரேப்பிட் பிரிவில் இன்னும் 3 சுற்றுகளே எஞ்சியுள்ளன.
