குஜராத்: எச்எம்பி தீநுண்மி பாதிப்பு 3-ஆக உயா்வு

குஜராத் மாநிலம், சபா்கந்தா மாவட்டத்தைச் சோ்ந்த 8 வயது சிறுவனுக்கு ஹியூமன் மெட்டா நியூமோ வைரஸ் (எச்எம்பி தீநுண்மி) பாதிப்பு உறுதிசெய்யப்பட்டது. இதையடுத்து, அங்கு இத்தொற்றால் பாதிக்கப்பட்டோரின் எண்ணிக்கை 3-ஆக உயா்ந்துள்ளது.

இதுகுறித்து சபா்கந்தா மாவட்ட ஆட்சியா் ரத்தன்கன்வா் கதாவிசரண் வெள்ளிக்கிழமை கூறியதாவது: பிரான்திஜ் தாலுகாவில் உள்ள விவசாயக் குடும்பத்தைச் சோ்ந்த 8 வயது சிறுவனுக்கு தனியாா் ஆய்வகத்தில் நடத்தப்பட்ட சோதனையில் எச்எம்பி தீநுண்மி பாதிப்பு இருப்பது உறுதிசெய்யப்பட்டது. அதன்பிறகு அவரின் ரத்த மாதிரிகள் அரசு ஆய்வகத்துக்கு அனுப்பப்பட்டிருந்தது. இந்நிலையில், அவருக்கு எச்எம்பி தீநுண்மி பாதிப்பு இருப்பதை அரசு ஆய்வகமும் வெள்ளிக்கிழமை உறுதிசெய்தது. அவா் ஹிம்மத்நகரில் உள்ள தனியாா் மருத்துவமனையில் சிகிச்சை பெற்று வருகிறாா். அவா் உடல்நிலை சீராக உள்ளது என்றாா்.

முன்னதாக, சிறுவனுக்கு செயற்கை சுவாச உதவியுடன் சிகிச்சையளிக்கப்பட்டு வருவதாக அந்த மருத்துவமனையைச் சோ்ந்த மருத்துவா்கள் செய்தியாளா்களிடம் தெரிவித்தனா்.

குஜராத் மாநிலத்தில் உள்ள மருத்துவமனையில் அனுமதிக்கப்பட்டிருந்த ராஜஸ்தானைச் சோ்ந்த 2 மாத கைக்குழந்தைக்கு எச்எம்பி தீநுண்மி பாதிப்பு இருப்பது கடந்த 6-ஆம் தேதி, உறுதிசெய்யப்பட்டது. சிகிச்சைக்குப் பிறகு குழந்தை நலமாக வீட்டுக்கு அனுப்பப்பட்டது.

கடந்த வியாழக்கிழமை அகமதாபாத் நகரைச் சோ்ந்த 80 வயது முதியவருக்கு இத்தொற்றின் பாதிப்பு உறுதிசெய்யப்பட்டதையடுத்து, அவா் தனியாா் மருத்துவமனையில் சிகிச்சை பெற்று வருகிறாா்.

இதன்மூலம், குஜராத்தில் எச்எம்பி தீநுண்மி பாதிப்பு 3-ஆக உயா்ந்துள்ளது.