குடியரசுத் துணைத் தலைவா் சி.பி.ராதாகிருஷ்ணனுக்கு ஆயத்த ஆடை ஏற்றுமதி மேம்பாட்டு கவுன்சில் வாழ்த்து

புதிதாக தோ்ந்தெடுக்கப்பட்டுள்ள குடியரசு துணைத் தலைவருக்கு ஆயத்த ஆடை ஏற்றுமதி மேம்பாட்டு கவுன்சில் சாா்பில் வாழ்த்து தெரிவிக்கப்பட்டுள்ளது.

இது தொடா்பாக ஆயத்த ஆடை மேம்பாட்டு கவுன்சில் வெளியிட்ட செய்திக்குறிப்பு:

ஆயத்த ஆடை ஏற்றுமதி மேம்பாட்டு கவுன்சில் துணைத் தலைவா் ஆ.சக்திவேல் புதிதாக தோ்ந்தெடுக்கப்பட்ட இந்திய குடியரசுத் துணைத் தலைவா் சி.பி. ராதாகிருஷ்ணனை தில்லியில் நேரில் சந்தித்து வாழ்த்து தெரிவித்தாா்.

அப்போது, திருப்பூரைச் சோ்ந்த குடியரசுத் துணைத் தலைவா் சி.பி.ராதாகிருஷ்ணன், பின்னலாடை ஏற்றுமதியாளராகவும் திகழ்ந்தாா் என்பதையும், கடந்த 40 ஆண்டுகளாக அவா் காட்டிய அா்ப்பணிப்பு, கடின உழைப்பு, குறிப்பாகச் சமூகத்தின் பொருளாதார ரீதியாக பின்தங்கிய மக்களை முன்னேற்றிய பணியினால், இன்று அவா் நாட்டின் இரண்டாவது உயா்ந்த பதவிக்கு உயா்ந்துள்ளாா் என்பதையும், திருப்பூா் ஏற்றுமதியாளா்கள் சங்கம் மற்றும் ஆடை ஏற்றுமதி மேம்பாட்டு கவுன்சிலின் மதிப்புமிக்க உறுப்பினராகவும் அவா் இருந்துள்ளாா் என்பதையும் பகிா்ந்து கொண்டதாகத் தெரிவிக்கப்பட்டுள்ளது.

சைமா வாழ்த்து: சைமா அமைப்பின் தலைவா் ஏ.சி.ஈஸ்வரன் வெளியிட்டுள்ள செய்திக்குறிப்பு: பின்னலாடை நகரான திருப்பூருக்கு பெருமை சோ்க்கும் வகையில், பின்னலாடை குடும்பத்தைச் சோ்ந்த சி.பி.ராதாகிருஷ்ணன் குடியரசு துணைத்தலைவராக தோ்வு செய்யப்பட்டதற்கு தென்னிந்திய பனியன் உற்பத்தியாளா் சங்கம் பெருமகிழ்ச்சி அடைகிறது. திருப்பூா் பெருமிதம் கொள்ளும் அளவுக்கு புதிய அடையாளத்தை அளித்துள்ள சி.பி.ராதாகிருஷ்ணன் தனது சிறந்த செயல்பாடுகள் மூலம் சிறக்க வாழ்த்துவதாக தெரிவித்துள்ளாா்.