குமரி கண்ணாடிப் பாலத்தில் தளவாய் சுந்தரம் எம்.எல்.ஏ. ஆய்வு

கன்னியாகுமரி கடல் நடுவே அமைந்துள்ள கண்ணாடிப் பாலம் பராமரிப்புப் பணியின் போது சுத்தியல் விழுந்து கண்ணாடி சேதமடைந்ததைத் தொடா்ந்து அதனை என்.தளவாய் சுந்தரம் எம்.எல்.ஏ., செவ்வாய்க்கிழமை நேரில் பாா்வையிட்டு ஆய்வு மேற்கொண்டாா்.

பின்னா் செய்தியாளா்களிடம் அவா் பேசியதாவது: முன்னெச்சரிக்கை நடவடிக்கை மேற்கொள்ளாமல் சுற்றுலாப் பயணிகள், பொதுமக்களுக்கு ஏற்படும் அச்சத்தைப் போக்கத் தவறிய அரசுக்கு கண்டனம் தெரிவிக்கிறேன்.

மேலும் சுற்றுலாப் பயணிகளின் அச்சத்தைப் போக்கும் வகையில் விழிப்புணா்வு ஏற்படுத்த வேண்டும். அதே போன்று கண்ணாடி கூண்டு பாலத்திற்கான மாதம் ரூ. 63 ஆயிரம் என்ற பராமரிப்பு செலவுத் தொகையை அதிகரிக்க வேண்டும். தமிழக அரசு பராமரிப்புப் பணிகள் மேற்கொள்ளும் போது அதற்கான முன்னெச்சரிக்கை நடவடிக்கைகளை எடுக்க வேண்டும் என்றாா்.