கேரளா: 5 வயது சிறுமியைக் கடித்த தெரு நாய்; தடுப்பூசி போடப்பட்டும் மரணமடைந்த சோகம்; என்ன நடந்தது?

கேரள மாநிலம் மலப்புரம் பெருவள்ளூரைச் சேர்ந்தவர் சல்மான் பாரிஸ். இவரது மகள் ஸியா பாரிஸ். 5 வயது ஆன ஸியா பாரிஸ் கடந்த மாதம் 29-ம் தேதி வீட்டுக்கு அருகே உள்ள கடைக்கு மிட்டாய் வாங்க நடந்து சென்றுள்ளார்.

அப்போது ஸியா பாரிஸைத் தெருநாய் ஒன்று ஆக்ரோஷமாகக் கடித்தது. அப்போது அவரைக் காப்பாற்ற வந்த சுமார் 6 பேரையும் அதே தெருநாய் கடித்தது.

நாய் கடித்ததில் சிறுமி ஸியா பாரிஸுக்குத் தலை, முகம், உதடு, கை, கால் என உடல் முழுவதும் 20 இடங்களில் காயம் ஏற்பட்டது.

நாய் கடித்த அன்றே ஸியா பாரிஸ் மற்றும் அவரைக் காப்பாற்ற முயன்றதில் நாய்க்கடிக்கு ஆளானவர்கள் அனைவரும் மருத்துவமனையில் சென்று தடுப்பூசி எடுத்துக்கொண்டனர்.

ஸியா பாரிஸுக்குக் குறிப்பிட்ட கால இடைவெளியில் மொத்தம் மூன்று தடுப்பூசிகள் போடப்பட்டன. நாய் கடித்த காயங்கள் ஆறிவந்த நிலையில் சகஜமாக விளையாடி வந்தார் ஸியா பாரிஸ்.

இதற்கிடையே கடந்த 16-ம் தேதி ஸியாவுக்குக் காய்ச்சல் ஏற்பட்டது. அதைத்தொடர்ந்து கோழிக்கோடு மருத்துவக்கல்லூரி மருத்துவமனையில் சிகிச்சைக்காக ஸியா பாரிஸை அழைத்துச் சென்றனர் பெற்றோர்.

சிறுமியின் உடலில் சில அறிகுறிகள் தென்பட்டதைத் தொடர்ந்து அவரது ரத்த மாதிரிகளை மருத்துவர்கள் பரிசோதனைக்கு அனுப்பினர். அதில் சிறுமிக்கு ரேபிஸ் வைரஸ் பாதித்திருப்பது கண்டறியப்பட்டது.

சுமார் 6 நாட்களாக அவசர சிகிச்சைப் பிரிவில் வெண்டிலேட்டர் உதவியுடன் ஸியா பாரிஸுக்குச் சிகிச்சை அளிக்கப்பட்டுவந்தது. சிகிச்சை பலனின்றி ஸியா இன்று அதிகாலை 2 மணி அளவில் மரணமடைந்தார்.

இதுகுறித்து மருத்துவர்கள் கூறுகையில், "சிறுமியின் தலையில் மட்டுமே நான்கு இடங்களில் நாய் கடித்ததில் ஆழமான காயம் ஏற்பட்டிருந்தது.

தலைமட்டும் அல்லாது முகம், உதடு உள்ளிட்ட இடங்களில் நாய் கடித்ததால் எளிதில் மூளைக்கு ரேபிஸ் வைரஸ் தொற்றியிருக்கிறது. சிறுமியைக் காப்பாற்ற அனைத்து வழிகளிலும் சிகிச்சை அளிக்கப்பட்டது.

நாய்க்கடி விஷத்தைத் தடுக்கும் தடுப்பூசிகள் போடப்பட்டும் பலன் அளிக்கவில்லை. மரணமடைந்த சிறுமியின் ஸியா பாரிஸின் உறவினர்களுக்கும் தடுப்பூசி போடப்பட்டுள்ளது" என்றனர்.

நாய்க்கடிக்கான தடுப்பூசிகள் அனைத்தும் போடப்பட்ட பின்னரும் சிறுமி மரணமடைந்த சம்பவம் கேரளாவில் அதிர்ச்சியை ஏற்படுத்தி உள்ளது.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... https://tinyurl.com/2b963ppb

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்...https://tinyurl.com/2b963ppb