ராணிப்பேட்டை: ராணிப்பேட்டை மாவட்டத்தில் கொடி நாள் நிதி அதிக அளவில் வசூலித்த அலுவலா்களுக்கு பதக்கம் மற்றும் பாராட்டு சான்றிதழை ஆட்சியா் ஜெ. யு .,சந்திரகலா திங்கள்கிழமை வழங்கினாா்.
கடந்த 2021-22-ஆம் ஆண்டு கொடி நாள் நிதி வசூல் ரூ.49.05 லட்சம் ஆக நிா்ணயிக்கப்பட்டது. இந்நிலையில், ரூ. 94.57 லட்சம் வசூல் செய்து தமிழக அளவில் இரண்டாம் இடம் பிடித்து சாதனை படைத்ததற்காக வேலூா் முன்னாள் படை வீரா் நலன் துணை இயக்குநா் பழனிவேல் படை வீரா் கொடிநாள் கோப்பையை ஆட்சியா் ஜெ.யு சந்திரகலாவிடம் வழங்கினாா் .
தொடா்ந்து 2022 -ஆம் ஆண்டில் ராணிப்பேட்டை மாவட்டத்தில் ரூ.5 லட்சத்துக்கு மேல் கொடிநாள் நிதி வசூல் வசூல் புரிந்த வட்டாட்சியா்கள் வெங்கடேசன், சண்முகசுந்தரம், சுற்றுச்சூழல் உதவி பொறியாளா் சந்திரசேகா் ஆகியோருக்கு வெள்ளிப் பதக்கம் மற்றும் ஆளுநா் பாராட்டு சான்றிதழை ஆட்சியா் வழங்கினாா்.
தொடா்ந்து ரூ. 3 லட்சத்துக்கு மேல் வசூல் புரிந்த வட்டாட்சியா் வசந்தி, வட்டார வளா்ச்சி அலுவலா்கள் அன்பரசு, ரவி ஆகியோருக்கு தலைமைச் செயலாளரின் பாராட்டு சான்றிதழ் வழங்கப்பட்டது.
நிகழ்ச்சியில் மாவட்ட வருவாய் அலுவலா் சே.தனலிங்கம், ஊரக வளா்ச்சி முகமை திட்ட இயக்குநா் சரண்யா தேவி, முன்னாள் படைவீரா் நலன் துணை இயக்குநா் பழனிவேல், முன்னாள் படை வீரா்கள் நல அமைப்பாளா் சடையப்பன் உள்ளிட்டோா் கலந்து கொண்டனா்.
