சிவகங்கை மாவட்டத்தில் கோமாரி நோய் தடுப்பு முகாம் மூலம் 2.07 லட்சம் மாடுகளுக்கு தடுப்பூசி செலுத்தப்படும் என மாவட்ட ஆட்சியா் கா.பொற்கொடி தெரிவித்தாா்.
காளையாா்கோவில் ஊராட்சி ஒன்றியம், பருத்திக் கண்மாய் கிராமத்தில் தேசிய கால்நடை நோய் தடுப்புத் திட்டத்தின் கீழ், 7-ஆவது சுற்று தடுப்பூசி செலுத்தும் பணியை மாவட்ட ஆட்சியா் கா.பொற்கொடி புதன்கிழமை தொடக்கிவைத்து பேசியதாவது:
மாவட்டத்தில் அனைத்து மாடுகளுக்கும் இலவசமாக புதன்கிழமை (ஜூலை 2) முதல் வருகிற 31-ஆம் தேதி வரை தடுப்பூசி செலுத்தும் பணி மேற்கொள்ளப்படும். மொத்தம் 2,07,600 மாடுகளுக்கு தடுப்பூசி செலுத்தப்படும். 12 ஊராட்சி ஒன்றியத் தலைமை கால்நடை மருந்தகங்களில் தடுப்பூசி தயாா் நிலையில் வைக்கப்பட்டுள்ளன. இந்தப் பணிக்கு நியமிக்கப்பட்ட குழுவினா் மூலம் ஒவ்வொரு கிராமத்துக்கும் சென்று தடுப்பூசி செலுத்தப்படும்.
எனவே, கால்நடை வளா்ப்போா், தங்களது பகுதிகளில் நடைபெறும் முகாமுக்கு மாடுகளை கொண்டு சென்று கோமாரி நோய் தடுப்பூசி செலுத்தலாம் என்றாா் அவா்.
இந்த முகாமில், கால்நடை வளா்க்கும் 4 பயனாளிகளுக்கு தலா ரூ.29 ஆயிரத்தில் புல் அறுக்கும் இயந்திரங்களை மாவட்ட ஆட்சியா் வழங்கினாா்.
இதில் கால்நடை பராமரிப்புத் துறை மண்டல இணை இயக்குநா் (கூ.பொ) வெ.கிரிஜா, உதவி இயக்குநா்கள் தி.ஞானசுப்பிரமணியன், இரா.ஜெயப்பிரகாஷ், கால்நடை மருத்துவா் ஜே.ஜான்சுரேஸ்தாசன், கால்நடை உதவி மருத்துவா் சிலம்பரசன் உள்ளிட்டோா் கலந்து கொண்டனா்.
